Na Janueri 2023, e sa ika50 ni yabaki ni kena tauyavu na valenivolavola ni tabana ena yasayasa o Normandy, e Varanise. E vakatatabutaki ni oti ena ika9 ni June, 1973.

E tu e liu na valenivolavola ni tabana e Varanise ena siti o Boulogne-Billancourt, e volekati Parisi. Ia ni tubu tiko ga na iwiliwili ni dautukutuku e laurai ni sa rui ka lailai na valenivolavola ni tabana qai sega ni qaravi vinaka na veika me baleti ira na tacida. E dau taba na noda ivola e Merika qai vakau ina wavu ena siti o Le Havre e Varanise. Qori e rauta na 200 na kilomita mai na valenivolavola ni tabana. Koya gona, e sagai me vakalailaitaki na gauna kei na ilavo e vakayagataki ena kena kau mai na noda ivola. E mani vaqarai e dua na qele ena kedrau maliwa na siti o Boulogne-Billancourt kei Le Havre. Ena tara ena vanua qori, eso tale na tabavale kei na itikotiko me baleta na valenivolavola ni tabana.

Era kunea na tacida e dua na vanua veiganiti ena tauni lailai o Normandy ena yasayasa o Louviers, e rauta ni 100 na kilomita mai na siti o Parisi kei Le Havre. E tekivu na tarataravaki ena 1972, qai mai vakaoti ena loma ni walu na vula.

Ena vica na yabaki e tarava, e tubu tiko ga na iwiliwili ni dautukutuku. E vinakati gona me caka eso tale na tarataravaki e Normandy. E mani voli e dua na qele qai tara kina eso na itikotiko. Ena 1996, ra qai tokitaki kina eso na lewe i Peceli mai Boulogne-Billancourt.

Nikua, era vunau tiko e sivia e 162,000 na dautukutuku ena 13 na vanua e vakarurugi ena valenivolavola ni tabana e Varanise. Ena 1998, e sa sega ni caka na tabaivola ena vale ni tabana e Varanise, ia e sa qaravi tale kina eso na itavi me tokona na cakacaka vakaitalatala. E okati kina na vakadewataki ni ivola vakaivolatabu ina 24 na vosa. E dau katoni qai vakarautaki tale ga kina na vidio. Nikua era veiqaravi tiko kina e sivia na 400 na mataveitacini.

Eda marau nida raica nona “vakatotolotaka” o Jiova na cakacaka vakaitalatala e Varanise!—Aisea 60:22.