Ena ika25 ni Julai, 2019, e dolava na valenivolavola ni tabana e Varanise e dua na vanua vou me maroroi kina na iVolatabu. E tiko na valenivolavola ni tabana ena tauni o Louviers, rauta ni 100 na kilomita na kena yawa mai Parisi. E kena usutu “The Divine Name and the Bible in French” (Na Yaca ni Kalou kei na iVolatabu vakaVaranise).

E vakaraitaki kina e levu na iVolatabu kunekunei dredre ena vosa vakaVaranise, e yaga tale ga. Dua oya na ivakadewa taumada ni Olivétan French Bible ena 1535, kilai tale ga me “La Bible de Serrières.” Qori na imatai ni iVolatabu taucoko ena Lotu Tawase ena vosa vakaVaranise, e imatai tale ga me vakadewataki mai na vosa taumada e volai kina na iVolatabu. E yaga dina na ilavelave qori ena vo ni vakadewa ni iVolatabu me vaka na Matthew’s Bible vakaValagi ni 1537, na Geneva Bible vakaValagi, kei na Geneva Bible vakaVaranise. Qo eso tale na iVolatabu kunekunei dredre e vakaraitaki kina—na ikatolu ni itabataba ni Jacques Lefèvre d’Étaples vakaVaranise ni 1541, na Latin Pentateuch ni 1541, kei na Latin Bible ni 1545, e tabaka o Robert Estienne, e dautabaivola e Parisi, vaka kina na French Bible ni 1557, e tabaka o Jean de Tournes na dautabaivola e Lyon.

E tiko na yaca ni Kalou o Jiova ena iVolatabu na Olivétan, na Latin Pentateuch, na Latin Bible i Estienne, kei na Jean de Tournes Bible. Na iVolatabu kece qori a soli vakailoloma ena Tabana ni iYau Maroroi ena iTikotiko Liu ni iVakadinadina i Jiova e Warwick, e Niu Yoka. E lai maroroi vata sara kei na iVolatabu sa tiko rawa ena valenivolavola ni tabana e Varanise.

E kaya o Enrique Ford ena Tabana ni iYau Maroroi: “E vakatubuqoroqoro dina na vanua era maroroi tu kina na iVolatabu vakaVaranise. E vakabibitaka tale ga na yaca ni Kalou o Jiova ena iVolatabu. Keimami na vaqarai ira tiko ga na iVolatabu vakasakiti va qori, mera biu ena vanua ni iyau maroroi era tiko ena neimami valenivolavola ni tabana e veiyasa i vuravura.”