Ena veiya va na yabaki, e dau vakayacori ena siti o Rouen e Varanise e dua na soqo e vakatokai na Armada. Era dau kauta yani na dausoko mai na veiyasa i vuravura na nodra waqa lelevu. E tekivu na soqo ena ika8 ni June me yacova na ika18, ra qai gade yani kina e rauta na le ono na milioni na vulagi. E mani tuvanaki ena loma ni gauna qori na vunau e matanalevu ena 12 na vanua ena siti. Era vakaitavi kina e sivia na 600 na tacida ra qai vunau vei ira e vicavata na drau.

E veitalanoa e dua na dauveitaba kei ratou na tacida ratou tiko ena qiqi ni vunau. E kaya ni qoroya na nodra veikauaitaki kei na nodra veidokai na tacida. Ratou mani veitalanoataka sara vakabalavu na nodra sa sega ni dauloloma e levu nikua. E wiliki qai vakamacalataki vua na 2 Timoci 3:1-5, e taura tale ga na brochure Marau me Tawamudu! E solia tale ga vei ratou na tacida na nona naba ni talevoni qai rai vakanamata me kila e levu tale na ka mai na iVolatabu.

E dua na goneyalewa e gole tale ga ina qiqi ni vunau qai tarogi ratou na tacida: “Ke sa vakaturi o Jisu, na cava ga era se bera ni vakaturi kina na wekada era sa mate? Au via raici rau tale na noqu bubu kei noqu tutu.” E vakaraitaka vua e dua na tacida yalewa na vidio Nodra Vakacegui na Lolosi. E taura tale ga na brochure qai vakadonuya me vulica na iVolatabu.

Eda marau vata kei ira na tacida e Varanise nira yalorawarawa ena ‘vuku ni itukutuku vinaka, mera bau vakaivotavota ena kena tukuni yani.’—1 Korinica 9:23.