Ena vula o Noveba era veisoliyaka na iVakadinadina i Jiova e veiyasa i vuravura na itabataba ni Vale ni Vakatawa Nb. 2 2020, vei ira na daunibisinisi, nodra lewenivuvale kei ira na tataleitaki. Dua na ka e vakasakiti kina na cakacaka vakavunau qo ni soli sara ga na mekesini vei ira kece na vakailesilesi vakamatanitu. E ciqoma e levu na valenivolavola ni tabana na nodra ivola ni vakavinavinaka.

Kena ivakaraitaki, o Rex Bhonapha na iVukevuke ni Minisita ni Tabana ni Qele, Veivakavaletaki, kei na Veivakatorocaketaki ni Taudaku ni Siti, e Sierra Leone. E vola ena nona ivola ni vakavinavinaka vei ira na tacida: “E veivakauqeti nomuni mekesini, e levu tale ga na ka au vulica kina. Au sa wilika tu ga e veisiga.”

E vola na Paraiminisita ni Samoa nona ivola ni vakavinavinaka vei ira na tacida. E kaya ni dau vakayagataka vakalevu na Masu ni Turaga. E vakavinavinakataka tale ga na iLiuliu ni Matanitu o Tuimalealiifano Vaaletoa Sualauvi II, nona taleitaka vakalevu noda cakacaka ni veivakavulici ena iVolatabu. E kaya ni “yaga vakalevu vei ira na lewenivanua nira vakavulici ena iVolatabu me rawa nira veisautaka nodra ivakarau ni bula.” E vakavinavinakataki ira tale ga na tacida nira tarova tiko na soqoni ena Vale ni Soqoni kei na vunau e veivale ena vuku ni COVID-19.

E kaya o Osvaldo Cartagena García na Vunivola ni Tauni e Chile: “Au nuitaka na ka oni cakava qo ena vukei ira na vakailesilesi ena neimami vanua kei ira na lewenivanua. Me uqeti ira tale ga mera vukei ira eso tale ena neimami vanua vakabibi na ka keimami sotava tiko eke kei na veiyasa i vuravura.”

E vola e dua na lewe ni palimedi e Jamani (Deutscher Bundestag) ina valenivolavola ni tabana e Urope e Loma, e tiko mai Jamani. E kaya: “Au kila vinaka nomudou isoqosoqo lotu. Au dau qoroya vakalevu nomuni doudou ni tukuna vei ira eso tale ni oni dua na iVakadinadina i Jiova. . . . Au kila ni levu vei kemuni oni vakalolomataki ena nodra veiliutaki na Nazi.”

Era vakavinavinakataka tale ga eso na vakailesilesi e Jamani na nodra veivakacegui na tacida vei ira na lewenivanua ni veitauvi tiko na COVID-19. Era kaya: “Nomuni vakacegui ira na lewenivanua oni sa vukei ira sara tiko ga mera veiyaloni.”

Rau vola tale ga nodrau ivola ni vakavinavinaka ina valenivolavola ni tabana e rua na vakailesilesi ni matanitu e Colombia. Rau vakavinavinakataka kina na mekesini, rau kaya tale ga ni rau na wasea vei ira eso tale na ka rau wilika. E vola tale ga na vakailesilesi ni Minisitiri ni iYau Bula: “Vinaka vakalevu na vakauta mai Na Vale ni Vakatawa, e tu kina na itukutuku ni veivakabulai!”

E kaya o Frank Okyere na mata ni Ghana i Japani: “Levu na itukutuku yaga e tiko ena mekesini qo, e vakamacalataki kina na iwali ni noda leqa na kawatamata.”

E kaya tale ga na mata ni Azerbaijan: “Vinaka vakalevu na vakauta mai ina ebesi na ilavelave ni Vale ni Vakatawa qo. E totoka na veika au wilika kina.”

Eda duavata kei na ka e tukuna o Brother Amaro Teixeira, na ovasia ni Tabana ni iTukutuku ena valenivolavola ni tabana e Mozambique: “Na veika e rawati qo e uasivia sara ga na ka eda namaka. Era sa rogoca na itukutuku vinaka o ira eda sega ni dau sotavi ira tu.”

Na kena vunautaki tiko ga na itukutuku vakaivolatabu vei “ira kece na vakaitutu,” eda na ciqoma kina eso tale nodra ivola ni vakavinavinaka na vakailesilesi kei ira eso tale.—1 Timoci 2:2.