Ena ika31 ni Okosita ina ika26 ni Okotova 2019, era vakaitavi na mataveitacini mai na 19 na matanitu ena dua na porokaramu ni vuli iVolatabu ena vosa vakaArapea e Austria kei Jamani. Era vakaitavi ena cakacaka lavotaki qori e 1,782 na iVakadinadina i Jiova, era vakayagataka e 40,724 na aua, era vakaraitaka vaka4,483 na vidio, era solia tale ga e 24,769 na ivola vakaivolatabu.

Ena veiyabaki sa oti, era toki mai Austria kei Jamani e sivia ni dua na milioni na isenivalu. Levu vei ira qori era gole mai ena matanitu vosa vakaArapea. Levu vei ira na isenivalu qori era se bera ni rogoca vakadua na itukutuku veivakacegui ena iVolatabu. Era veiqaravi tiko ena yalava ni vosa vakaArapea e Austria kei Jamani e 1,108 na dautukutuku. Era sa qai mai veitokoni na tacida mai Kenada, Merika, kei na vica na matanitu e Urope. Era sa qai gole ena 24 na vanua me vaka na siti lelevu o Berlin, Cologne, Dresden, Frankfurt, Graz, Hamburg, kei Vienna.

E vola e dua na tacida ena vanua qori: “Keimami sega vakadua ni tadra na kena yaga vei keimami na cakacaka lavotaki qo. Era mai vakauqeti keimami sara ga na mataveitacini era mai veitokoni. Keimami vakavinavinakataka vakalevu na nodra veivuke. Keimami marautaka vakalevu ni keimami bau vakaitavi tu ena cakacaka lavotaki qo.”

E lai soqoni kei ira na iVakadinadina i Jiova e dua na cauravou e gole mai ena dua na matanitu e vosa vakaArapea. Ni oti na soqoni, dua na ka na nona marau qai taroga e dua na tacida: “O kila se cava na ibalebale ni mahabba vakaJamani?”

E kaya sara yani na tacida, “Liebe (loloma)!”

E kaya yani o cauravou: “Io, na itovo sara ga qori au raica ena soqoni nikua! Oni sa rui veikauaitaki. Oni vakabula kece vei au, oni mai lululu. Au raica na nodra veidokai na gole mai ena duidui matanitu. Ke ra va mada ga qo na tamata kece e vuravura, sa na bau duatani sara ga!”

E kaya tale e dua na tagane me baleti ira na iVakadinadina i Jiova: “Oni kila na sala moni veimaliwai kina kei ira eso tale, ena vakilai na vakacegu ena vanua oni tiko kina.”

E dua na veiwatini erau gole mai ena dua na matanitu e vosa vakaArapea, rau sa tiko e Jamani e rauta ni dua na yabaki. Erau mani sureta e rua na tacida me rau lai gunu ti ena nodrau vale. Ni rau sa vakamacalataka oti na tacida na vu ni nodrau gole yani, e taroga sara mai o yalewa, “Drau iVakadinadina i Jiova?” Rau kaya yani na tacida, “Io!” E kaya tale o yalewa: “Au sega sara ga ni vakabauta! Sa vakavula noqu vaqarai kemuni tiko. Au gole mada ga ena ikelekele ni sitima meu lai vaqarai kemuni. Qo drau sa tu sara. Drau lakovi au mai! E talai kemudrau sara ga mai na Kalou.”

E vakalougatataka dina o Jiova na nodra sasaga na tacida ena cakacaka lavotaki qo ena kena wasei na inuinui mai na iVolatabu vei ira na“lewe ni veivanua kece ga.”—Maciu 28:19.