Ena ika8 ni Epereli 2024, e yaco na butoleka ya na kena tabonaka na matanisiga na vula, qai laurai qori ena so na vanua e Noca Merika. E vica vata na milioni era gole mera lai sarava na ka vakatubuqoroqoro qori, qai levu era gole mai vakayawa. E tuvanaki sara na cakacaka vakavunau lavotaki ena sivia na 24 na siti e yaco kina na butoleka. E vakarautaki na qiqi ni vunau kei na ivola vakaivolatabu ena rauta ni 15 na vosa, ra qai vakaitavi kina na tacida e Kenada, Mexico, kei Merika.

Rau gole e rua na cauravou gonevuli vei rau na tacida yalewa rau toka ena qiqi ni vunau e Carbondale, Illinois, e Merika. E vakaliuliu sara e dua na tacida yalewa qai tarogi rau na taro e toka ena qiqi, “Was Life Created?” Ni ratou veitalanoa tiko e taroga sara e dua vei rau na cauravou: “Ke tiko na Kalou qai lomani keda, cava ga e vakalaiva tiko kina na veika rarawa?” Rau vakaraitaka sara na tacida na sala me rau raica kina na isaunitaro ena jw.org. Rau kurabui na cauravou ni saumi sara ga ena dua na vidio na nodrau lomatarotaro. Rau vinakata me rau kila e levu tale na ka, me rau wasea tale ga qori vei ira na nodrau itokani.

E kidroataka e dua na cauravou vosa vakaPunjabi ni vakabula yani vua e dua na tacida yalewa ena vosa qori ni duri tiko ena qiqi ni vunau e Sherbrooke, Quebec, e Kenada. Ratou veitalanoa vinaka sara, e vakaraitaki tale ga vua na iwalewale ni vuli iVolatabu ni vakayagataki na brochure Marau me Tawamudu! E kurabuitaka na cauravou qori ni rawa mada ga ni vulica na iVolatabu ena gauna kei na vanua e veiganiti vua, se vakayagataka tale ga na videoconference. E tuvanaka sara na tacida yalewa me rau vuli iVolatabu kei na dua na tacida tagane.

E dua na tacida yalewa a tiko ena qiqi ni vunau e Evansville, Indiana, e Merika. A veitalanoa tiko kei na dua na marama, mani kaya na marama qori ni se qai toki yani ena yasayasa ya me lai qaravi tinana e tauvimate. E kaya na tacida ni qaravi tinana tale tiko ga qai kila vinaka na dredre ni veiqaravi. E wilika tale ga vua na vosa veivakacegui ena Aisea 33:24 kei na Vakatakila 21:4. E uqeta sara ga na marama qori na ka e yalataka na iVolatabu, qai kerea me wiliki tale. Rau veitalanoa vinaka sara, e tuvanaki me tomani tale na nodrau veitalanoa.

Eda marau ni rawa vei ira na tacida e Noca Merika mera vakayagataka na gauna vakasakiti qori mera veivakavulici kina ena veika me baleta na “Dauveibuli Cecere”, kei na veika totoka sa yalataka tu.​—Dauvunau 12:​1, 2.