E ka ni marau vua na iLawalawa Dauvakatulewa me vakaraitaka nida sa yacova e dua na cavuikalawa vou ena noda saga meda vakavulici ira na lewe ni veivanua kece ga mera tisaipeli. Sa vakarautaki ena JW.ORG na ulutaga, vidio kei na katokatoni ena 1,000 na vosa, wili kina e 100 na vosa vagalu.

E kaya o Brother Gerrit Lösch, e lewe ni iLawalawa Dauvakatulewa: “Se tekivu makawa sara na neimami cakacaka ni vakadewa ena icavacava ni veiyabaki ni 1800, ia e toso cake sara ga ena vica na yabaki sa oti.” E kaya tale ga o Brother Geoffrey Jackson, e lewe ni iLawalawa Dauvakatulewa: “Ena Janueri 2013, sa vakadewataki na website ena 508 na vosa. Keitou cakava tiko mai qori ena sivia na duanadrau na yabaki. Ia dua na ka vakasakiti e yaco, oya ni voleka ni vakaruataki na ka keitou vakadewataka ena loma ga ni vitu na yabaki, mai na 508 na vosa ina 1,000.”

E levu dina na ka e rawa ni download ena website ena 1,000 na vosa. E 821 vei ira na vosa qori e vakadewataki kina na website. Qo duadua ga na website e vakadewataki ena levu na vosa e veiyasa i vuravura. Era qarava na cakacaka levu ni vakadewa o ira na bolecakacaka, era vakavulici vinaka tale ga ena rauta ni 350 na valenivolavola ni vakadewa tu yawa e veiyasa i vuravura.

E vakamacalataka o Brother Izak Marais, na ovasia ni Tabana ni Vakadewa ena itikotiko liu e Warwick, Niu Yoka, e Merika: “E sega ni rawarawa na kena vakadewataki me tabaki tale ga na ivola kei na vidio ena levu na vosa. Eso na gauna keitou na via tabaka na ivola ena so na vosa e sega ni vosataki vakalevu, ia e sega tu na kedra matanivola. Ena vica gona na yabaki sa oti, keitou bulia e levu na matanivola ni vosa qori, me rawa ni keitou tabaka kina e levu na ivola ena vica na drau na vosa. E sega tale ga ni rawarawa na kena vakarautaki na vidio, katokatoni kei na ivola ena vica vata na vosa ena jw.org. Ya na vuna e levu vei ira na 1,000 na vosa qori e se bera ni vakarautaki tu kina na ivola, vidio kei na katokatoni ena website.”

E kaya tale ga o Brother Clive Martin, na ovasia ena tabana ni porokaramu na MEPS: “E sega ni rawarawa me keitou vaqara e dua na sala me tabaki kina e dua na ulutaga ena vosa e duidui na kena volavolai, kei na kena matanivola. Kena ivakaraitaki, e 21 na vosa ena website e volai mai na imatau ina imawi. Ena 100 na vosa vagalu, ena vinakati me keitou bulia e dua na kena porokaramu me rawarawa nira vakayagataka na galu.”

Vei ira na daunibisinisi era na vakadewataka ga na vosa ena nodra website ena totolo kina na nodra rawailavo. Ia qori e sega ni neimami inaki na iVakadinadina i Jiova. Keimami saga me keimami vakaraitaka na ka e kaya na iVolatabu vei ira e levu, ena sala e rawarawa qai veiuqeti.

Eda vakacaucautaki Jiova ni vakalougatataka noda sasaga meda vakavulici ira na “lewe ni veivanua kece ga mera tisaipeli.” Eda na nuitaki Jiova ni na solia vei keda na kaukaua, kei na ka kece eda vinakata meda vunautaka kina na itukutuku vinaka ni Matanitu ni Kalou vei ira na yalomalumalumu e veiyasa i vuravura, me yacova na gauna e kaya kina sa rauta.—Maciu 28:19, 20.