Ena ika26 ni Julai 1931, a vakayacori e dua na soqo ena siti o Columbus, Ohio mai Merika. E vosa kina o Brother Joseph F. Rutherford e peresitedi ni Watch Tower Bible and Tract Society ena gauna ya, vei ira e sivia na le 15,000. E dua na iwase ni porokaramu ni soqo e kaburaki ena sivia na 450 na siteseni ni retio e veiyasa i vuravura. E vakamacalataka kina o Brother Rutherford e dua na inakinaki bibi e kena ulutaga, “Na Yaca Vou.” E kaya: “Tekivu nikua eda na vakatokai meda iVakadinadina i Jiova.” (Raica na kato, “ Na iNakinaki.”) Era vakadonuya qori na tiko ena soqo nira kailavaka “Io!” E rogo levu tale ga na nodra vakasausau.

E tabaki na italanoa ni nona bula o Brother Arthur Worsley ena 1986. Qo na ka e kaya me baleta na soqo: “Au sega ni guilecava rawa na rorogo ni kaila, kei na vakasausau.

Eso mai na veiyasa i vuravura era rogoca ena retio na wiliki ni inakinaki qori. E kaya o Brother kei Sister Barber mai Ositerelia: “Ni rogo mai na vakasausau mai Merika, era tucake qai vakasausau tale ga na mataveitacini e Malevani.” Era rogoca tale ga qori e dua na ilawalawa lailai mai Japani, wili kina o Sister Matsue Ishii. Oti e qai vola: “Keimami kaila tale ga ena marau kei ira na mataveitacini mai Merika.”

Eso era kaya nira veisautaka na sitoa ena siti o Columbus, Ohio, na nodra ivakatakilakila ni veikidavaki vei ira na International Bible Students. Era qai vola kina, “Ni bula vinaka na iVakadinadina i Jiova.” Gauna ya e dau tabaka tiko na Watch Tower Bible and Tract Society e dua na niusipepa, e vakatokai The Messenger. Ena ika28 ni Julai 1931, e volai kina na veika me baleta na soqo. Qori e imatai ni gauna me tabaki ena dua na ivola na yaca iVakadinadina i Jiova.

Oti ga vakalailai na soqo era vakaitavi na mataveitacini ena dua na vunau lavotaki ena vica vata na vosa. Era veisoliyaka kina e dua na ivola lailai e vakatokai The Kingdom, the Hope of the World. E volai tale ga kina na inakinaki kei na yaca vou. Oti e rua na vula e veisoliyaki e sivia e lima na milioni na ilavelave ni ivola qori, qai levu e soli vei ira na iliuliu ni lotu, vakailesilesi vakamatanitu kei ira na daunibisinisi.

Qo na ka e kaya o Brother Martin Poetzinger me baleta na gauna qori: “Era kidacala na itaukeinivale ni keimami kaya: ‘Au gole mai nikua niu dua na iVakadinadina i Jiova.’ Era kurekure ga qai kaya: ‘Au nanuma ga ni oni vakatokai na Gonevuli ni iVolatabu’” (Raica na kato, “ Vakatakilai na Yaca i Jiova ena Kad Lailai.”) Ia oti e vica na yabaki sa qai vola o Brother Poetzinger: “Levu sara na ka sa veisau! Qo ni bera mada ga ni o vunau, sa ra taroga mai na itaukeinivale: ‘O iVakadinadina i Jiova?”

E tiko tale ga ena soqo qo o Brother A. H. Macmillan, e kaya: “Dua dina na vakasama vinaka meda vakatokai meda iVakadinadina i Jiova. Ni yaca qo e vakamacalataka na noda ilesilesi, kei na veika eda via cakava. Eda a kilai tu meda Gonevuli ni iVolatabu, ni ya na ka eda cakava tu ena gauna ya. Era mani tomani keda eso tale mai na veiyasa i vuravura ena kena vulici na iVolatabu, da qai vakatokai kina meda International Bible Students. Ia qo eda sa nona ivakadinadina na Kalou o Jiova. Na yaca qori e vakamacalataki keda, kei na noda ilesilesi vei ira na lewenivanua.”

Nikua, e ka dokai nodra vakatokai e dua na iwiliwili levu mai na veiyasa i vuravura mera iVakadinadina i Jiova.—Aisea 43:10-12.