NOVEBA 7, 2023
IROGO MAI VEIYASA I VURAVURA
Duanadrau na Yabaki na Tabaki ni Vale ni Vakatawa ena Vosa vakaPotukali
Ena 1923, a gole i Brazil o Brother George Young me tauyavutaka na valenivolavola ni tabana, me tuvanaka tale ga na cakacaka vakavunau. Gauna ya, e vakayagataki tiko e Brazil na itabataba vakavalagi, The Watch Tower and Herald of Christ’s Presence (sa kilai ena gauna qo The Watchtower Announcing Jehovah’s Kingdom). E tuvanaka sara o Brother Young me vakadewataki qai tabaki na Vale ni Vakatawa ena vosa vakaPotukali. Ena Okotova 1923, e tabaki na imatai itabataba ni Vale ni Vakatawa ena vosa vakaPotukali. Oti e tolu na yabaki, e vakau e kea e dua na misini ni tabaivola mai na iTikotiko Liu mai Brooklyn, Niu Yoka e Merika. E tekivu tabaki sara kina na noda ivola.
iMawi: Na imatai ni misini ni tabaivola e vakayagataki ena valenivolavola ni tabana e Brazil. iMatau: Na imatai ni itabataba ni Vale ni Vakatawa ena vosa vakaPotukali e tabaki ena valenivolavola ni tabana e Brazil
Na imatai ni Vale ni Vakatawa e tabaki ena vosa vakaPotukali ena 1925, e Potukali
Ena 1925, ni oti na kena tabaki na imatai ni Vale ni Vakatawa ena vosa vakaBrazil, era tekivu vakadewataka na tacida na Vale ni Vakatawa ena vosa vakaPotukali ni Urope. Ia ena 1933, era tekivu tusaqati na tacida ni sa veiliutaki e dua na matanitu voravora. Sa mai cegu kina na cakacaka ni vakadewa e Potukali. E vica vata na yabaki nodra sa qai vakayagataka tiko na mataveitacini e Potukali na Vale ni Vakatawa ena nodra vosa ga, ia e tabaki mai Brazil. E kaya e dua na tacida yalewa o Isabel, a tiko e Potukali ena gauna ya: “Au sega ni kauaitaka sara na ibiubiu ni vosa se na kena ibalebale, au saga ga me tara na lomaqu kei na noqu vakasama na ka au wilika. E dredre me tabaki e Potukali na ivola vakaivolatabu, ia au vakavinavinakataki ira na tacida e Brazil ena nodra sasaga me vakarautaki qori ena neimami vosa.”
Ena 1961, ni tabaki oti na vakadewa taucoko vakavalagi ni New World Translation e vakadonui me vakadewataki ena ono tale na vosa, wili kina na vosa vakaPotukali. E dredre toka, ia era lalawataka na timi ni vakadewa vakaPotukali e Brazil mera vakayagataka na vosa era kila o ira kece na vosa vakaPotukali ena veivanua. Qori tale ga na ka e muri ena vica vata na yabaki ni vakadewataki na Vale ni Vakatawa ena vosa vakaPotukali. Ia ena 2017, e vakadonui me vakadewataki na Vale ni Vakatawa ena vosa vakaPotukali (e Brazil), kei vosa vakaPotukali (e Potukali).
iMawi ina imatau: Era vunau tiko eso na tacida e Angola, Brazil, Potukali kei Mozambique nira vakayagataka na Vale ni Vakatawa ena vosa vakaPotukali
E veiyasa i vuravura e rauta ni 1.2 na milioni na dautukutuku era vosa vakaPotukali, qai rauta ni 260 na milioni na lewenivanua e rawa ni uqeti ira na nodra vakayagataka na Vale ni Vakatawa ena vosa qori. E neimami masu ni na yaga tiko ga vei ira qori, kei na so tale e veiyasa i vuravura na nodra vulica na “veika vakatubuqoroqoro ni Kalou.”—Cakacaka 2:11.