Ni vakatauvatani kei na vo ni tuvaitutu e vakayacori ena veiyabaki sa oti, e duatani duadua nodra tuvaitutu na ika148 ni kalasi ena Koronivuli e Kiliati. Ena sala cava? E sega ni dua na sureti e gole yani ena vanua ni soqo. Era sa sarava ga na porokaramu ena internet. Qo na imatai ni soqo vakayalo me tuvanaka na isoqosoqo ni tu vakarau me veisau ena vuku ni matedewa e tete tiko qo e veiyasa i vuravura.

A vakayacori na tuvaitutu ena ika14 ni Maji 2020, ena nodra vanua ni vuli na iVakadinadina i Jiova e Patterson, e Niu Yoka. Era tuvaitutu kina e 55 na gonevuli. a E jeameni ni soqo o Brother Stephen Lett, e dua na lewe ni iLawalawa Dauvakatulewa.

Ni vo e vica na macawa ni tuvaitutu, sa kaburaki ena nius ni sa tete sara tiko e veiyasa i vuravura na matedewa qo na COVID-19. Ia me vaka sa vakamacalataki oti ena iRogo ena website, e vakalewa vinaka na itikotiko liu ni iVakadinadina i Jiova na ituvaki, qai vakarautaka na idusidusi ena ivavakoso kece me salavata kei na ivakaro ni matanitu.

Dua vei ira na ivakaro qori me kua ni caka na soqoni vakalewelevu. E raica vinaka sara na tikina qori na iLawalawa Dauvakatulewa kei na so tale na vuna, sa qai vakatulewataka me kua ni dua na vulagi me gole ena tuvaitutu, me kua tale ga ni dua e tiko ena olo e caka kina na soqo. Era ivakaraitaki vinaka na lewenivuvale e Peceli kei ira na gonevuli ni Kiliati, nira muria vinaka na veidusimaki qori.—Joni 13:34, 35.

Ia e vakarautaki e dua na ituvatuva mera sema nodra vulagi na gonevuli e Kiliati, kei ira na lewenivuvale e Peceli. E rawa kina nira sarava na porokaramu e sivia ni 10,000 na mataveitacini e veiyasa i vuravura, wili kina nodra itokani na gonevuli kei na nodra vuvale.

Se mani vakacava na tete ni matedewa qo, e vinakata na iLawalawa Dauvakatulewa me tomani tiko ga noda ituvatuva vakayalo, vakabibi na soqoni ni vavakoso e veimacawa. E vakarautaka kina na iLawalawa Dauvakatulewa na idusidusi matata ena valenivolavola ni tabana kece e veiyasa i vuravura, ena sala me veisautaka kina na ituvatuva ni soqoni me salavata kei na ituvaki ni vanua. Eso na vanua, ena vinakati mera soqoni ga vakalewe lailai na tacida, se mera vakayagataka na vidio. Eda nuidei ni na vakarautaki tiko ga na kakana vakayalo ena ivavakoso kece e veiyasa i vuravura.

E matata ni na sega ni dua na ka ena tarova na kaukaua i Jiova, me tokoni keda kina vakailawalawa meda vosota na veika dredre.—Same 18:29.