Ena ika13 ni Julai 2021, e duavata na European Court of Human Rights (ECHR) kei Brother Rostom Aslanian. Rau okati tiko ena kisi qori o Moldova kei Rusia. E sega ni via curu ena mataivalu o Brother Aslanian, e qai valataka nona kisi nira totogitaki koya na vakailesilesi e Transnistria (Pridnestrovskaia Moldavskaia Republic) me vesu me dua na yabaki. Na vakataulewa e cakava qo na ECHR, e rawa kina vei ira e Transnistria mera sokalou ena galala.

E kilai e vuravura raraba ni o Transnistria e wili e Moldova. Ia e lewa tiko o Rusia na veika vakailavo kei na so tale na ka e Moldova. Na vanua ruarua qori e okati tiko ena European Convention on Human Rights, ena vinakati tale ga me rau doka nodra galala ni sokalou na lewenivanua yadua.

Ena 2010, a tukuni vei Brother Aslanian me curu ina mataivalu. Ia a sega ni via vakaitavi kina ena vuku ni nona vakabauta, e mani kerea me cakava e dua na cakacaka raraba. Ena ika29 ni Maji 2011, e sega ni vakadonui nona kerekere, e beitaki ga ni cala qai vesu me dua na yabaki. Oti nona vesu, a soli na nona kisi ina European Court of Human Rights.

Ni dikeva na ECHR na kisi nei Brother Aslanian e kaya ni sega ni donu vakalawa nona vesu ni sega ni via curu ena mataivalu. E raica tale ga na Mataveilewai qori, ni matanitu sara ga o Rusia e monataka tiko na ka ni mataivalu, ilavo kei na veika vakapolitiki e Transnistria. Kena ibalebale, e vakavuna ga o Rusia nona vesu vakatawadodonu o Brother Aslanian, sega ni o Moldova. E kaya kina na ECHR nira beca na vakailesilesi nona galala ni sokalou Brother Aslanian, ya nira vesuki koya me dua na yabaki. E vakarota tale ga ina matanitu o Rusia me saumi vakailavo o Brother Aslanian.

Eda marau ni lewa qo ena taqomaka nodra galala ni sokalou na tacida mai Transnistria. Qori e vakadeitaka tale vei keda nona loloma o Jiova, kei na nona dau kauaitaki keda nida sotava na ituvaki dredre.—Same 18:25.