Ena gauna ni matedewa qo, levu na ivavakoso e veiyasa i vuravura era vakayagataka na kompiuta kei na talevoni mera tiko ena soqoni. Ia eso na tacida era tu ena vanua yawa e dredre kina na internet. Dua na ka nodra sasaga me rawa nira dei tiko ga ena nodra ituvatuva vakayalo, ena gauna vata qori era muria tiko na vakatatabu ni COVID-19. Dikeva qo eso na kena ivakaraitaki mai Aferika.

Levu na tacida ena vanua qo e sega ni rawa nira vakayagataka na zoom ni sega na internet. E veimacawa ena vakauta na valenivolavola ni tabana e Malawi, na vidio ni soqoni vei ira na qase ni ivavakoso ni vakayagataka na talevoni. Era na qai vakauta na qase ni ivavakoso na vidio qori vei ira kece na dautukutuku.

Ia e via dredre toka qori vei ira na le 28 na dautukutuku ena ivavakoso o Tcharo. Era tiko na tacida qori ena veiulunivanua ena vualiku kei Malawi volekata na Drano o Malawi. Na levu ni ulunivanua e dredre kina na veitaratara ena talevoni. Ena taubaletaka gona na qase ni ivavakoso e vica vata na kilomita me yacova na vanua sa vinaka kina na veitaratara ena talevoni. Oti ena taubale lesu ena veiulunivanua qai saga me volekata nodra vale na tacida me rawa ni vakauta na vidio ni vakayagataka na bluetooth.

Era marau vakalevu na qase ni ivavakoso ena gauna qo, ni sa rawa na veitaratara ena talevoni volekata ga nodra dui vale na tacida. Era na vodo na tacida ina bavelo ra qai soko ina drano me rawa ni download na vidio. Era na sega kina ni taubale vakayawa na qase ni ivavakoso.

Me rawa nira “veisiko” na ivakatawa ni tabacakacaka ina ivavakoso ena vanua tu yawa ena vuaira kei Mozambique, era na vakayagataka na talevoni mera vunau kina. E sega ni rawa ni caka ena vanua qori na conference call. Ena vunau gona na ivakatawa ni tabacakacaka ni tuvani tu e matana e vica vata na talevoni, ra qai sema tu kina na dui vuvale ena ivavakoso.

Eso na dautukutuku era tu ena vanua yawa sara qai dredre na veitaratara kei ira ena talevoni. Ni vakarau tekivu na soqoni era na taubale na tacida qori e loma ni veikau me yacova na vanua sa vinaka kina na qiri ena talevoni. Gauna era sa sema kina ina ivavakoso era na dabe ga ena vanua qori ra qai vakarorogo.

E ivakatawa ni tabacakacaka ena yalava qori o brother Yohane Vinho. E kaya: “Levu na tacida era sasaga vakaukaua mera tiko ena soqoni.” Dina nira tu yawa ia na ka era cakava e vukei ira mera kaukaua tiko ga vakayalo. Dua tale na ivakatawa ni tabacakacaka o brother Carlos Cortazão, e kaya: “Vaka ga keimami tu vata kei ira na tacida e Vale ni Soqoni. Keimami vakamacala qai lagasere vata. Keimami raica na liga i Jiova ni vakani ira tiko ga vakayalo nona tamata ena gauna ni matedewa qo.”—Joni 21:17.