8 MAJI, 2021
IROGO MAI VEIYASA I VURAVURA
Era Vukei Luvedra na iTubutubu ena iRogo ena Noda Website
Levu na itubutubu iVakadinadina i Jiova era vakayagataka na irogo ena website qo mera vaqaqacotaka kina nodra vakabauta na luvedra.
O Sister Fumiko Takehara e dua na tina mai Japani, rau dau wilika qai veivosakitaka kei luvena tagane o Naoki e yabaki 12 na irogo ena website. Rau dau tabaka na kedra itaba na tacida rau qai vakaliliga ena lalaga ni nodrau vale. E kaya o Fumika: “Keirau dau cavuta sara ga na yacadra ena neirau masu. Keirau lomavakacegu ni keirau kila o Jiova ena vakacegui ira nona tamata ke ra tu mada ga e valeniveivesu. Keirau raica sara ga na marau e matadra na tacida. Nodra ivakaraitaki vinaka e vukei luvequ me yalodina tiko ga vei Jiova e koronivuli.”
Ratou vakayagataka na vuvale na Zannou na irogo me rawa ni ratou doudou na vunau
E kaya o Brother Kilanko Zannou, e dua na tama mai Côte d’Ivoire: “E veisiga au na raica ke tiko e dua na irogo vou ena jw.org.” E dau qai vakayagataka qori o Kilanko ena nodratou sokalou vakavuvale. Ratou vulica kina vakavuvale, wili kina o Matthias na luvena tagane yabaki vitu na nodra yaloqaqa na tacida nira tusaqati.
E rere o Matthias me vunau vei ira nona lewenikalasi. Ia e kaya o Kilanko: “Oti neitou sokalou vakavuvale, e kaya o Matthias: ‘Au sa sega ni rere na vunau!’”
O Brother Holmes Simatupang e dua na tama mai Idonisia, a wilika vei rau na luvena e rua na irogo me baleti ira na tacida gone e Idonisia era vakatalai mai koronivuli nira sega ni via vakarokorokotaka na kuila.
Ratou veivosakitaka tiko na vuvale na Simatupang na irogo me baleti ira na itabagone era yalodina e koronivuli
E kaya o Brother Simatupang: “E dredre tale ga na ituvaki rau sotava na luvequ e koronivuli. Era dau vakasaurarataki rau na qasenivuli kei ira na gone me rau vakarokorokotaka na kuila, lagata na sere ni matanitu qai vakaitavi ena nodra lotu. Eso na gauna rau dau rere na lako i vuli.
E kaya o Holmes: “Ni keitou veivosakitaka oti e rua na irogo qo ena neitou sokalou vakavuvale, rau sa doudou me rau vakamacalataka na vuna rau sega ni vakarokorokotaka kina na kuila. Rau sa sega ni lomaleqataka ke rau na vakatalai mai koronivuli.”
E kaya o Sister Lady Nery Passos mai Brazil: “Ni se yabaki lima se ono o Pedro na luvei keirau tagane, e vinakati me vakamacalataka na vuna e sega ni marautaka kina na siganisucu e koronivuli.” Ni vinakata o Lady Nery me vukei Pedro, e vakasamataka mai na nodra ivakaraitaki na tacida ena irogo. Ya nira vakarautaki ira vinaka ni bera nira veilewaitaki. E kaya: “Keitou dau vakatovotovotaka ena sokalou vakavuvale na veika ena rawa ni yaco dina. Qori e vukei koya me kila na ka me cakava ni marautaki e dua na siganisucu e koronivuli.” Nodratou dau vakatovotovo vakavuvale e vukei Pedro me doudou ni vakamacalataka nona vakabauta.
Rau vakayagataka o Brother kei Sister Passos na irogo me rau vakavulici luvedrau kina me tutaka nona vakabauta
Na irogo ena noda website e vukei keda meda kila na sala e vakaukauataki ira, qai karoni ira kina nona tamata yalodina o Jiova. Eda vakadinadinataka ni gauna eda vakatovolei kina eda ‘marau, e sobuti keda tale ga na yalo tabu’ me rawa nida vosota.—Cakacaka 13:50-52.
Rawa ni o Wilika Tale ga
ITUKUTUKU VOU
iVakadinadina i Jiova Era Vesu ena Vuku ni Nodra Vakabauta—Vanua
Vanua era vesu kina na iVakadinadina i Jiova ena vuku ni nodra vakabauta kei na nodra muria na dodonu vakalewenivanua. Eso na gauna e ca sara na kedra ituvaki.
TARO E TAROGI WASOMA
Cava Era Sega ni Dau Solevutaka Kina na iVakadinadina i Jiova Eso na Olodei?
Dikeva e va na taro bibi me baleti ira na iVakadinadina i Jiova kei na olodei.
