E cakacaka vata na valenivolavola ni tabana e Rwanda kei Zimbabwe, kei ira na qase ni ivavakoso ena nodra vukei na tacida era vakaleqai vakailavo ena vuku ni matedewa na cornavirus. Qori na kena vakarautaki vei ira na ka era gadreva ena nodra bula e veisiga.

Ena ika2 ni Epereli 2020, e vakauta e dua na itukutuku na Komiti ni Tabana e Rwanda vei ira na qase ni ivavakoso mera tukuna yani na yacadra na tacida era vakaleqai vakailavo ena vuku ni matedewa na COVID-19, me rawa nira vukei. Na gauna ga era taura kina na itukutuku qori na qase, e sa qai tuvanaki me vakau na kedra na tacida kei na so tale na ka era gadreva.

Ni oti e rua na macawa, sa tuvanaka na valenivolavola ni tabana e Rwanda e 31 na Komiti ni Vakacoko (DRCs). Era veisoliyaka gona vei ira na tacida era vakaleqai na falawa e qaqi mai na sila, raisi, bini, masima, suka, kei na waiwai ni vakasaqa. Era sa vukei oti e sivia ni 7,000 na vuvale.

Qo na ka e kaya o Sister Nizeyimana Charlote kei na tolu na luvena ni oti nodratou vukei: “Vinaka vakalevu na nomuni tokoni keitou vakayalo, vakayago tale ga ena gauna ni matedewa qo. E sega ni tukuni rawa na levu ni neitou vakavinavinaka.”

Qo tale na ka e tukuna e dua na tacida tagane ena siga e tukuni kina vua ni sa tiko na ka ni veivuke vei ratou na nona vuvale: “Ena siga qori, e rebo sara ga o watiqu ena levu ni nona viakana. Oti ga ya, sa qiritaka mai e dua na tacida tagane meu lai kauta mai na keitou. Au sega sara ga ni vakabauta. Au vakavinavinakataki Jiova tu ga ena bogi taucoko.”

Sa vakilai rawa tu ena vanua qori na leqa ni kakana, ia na matedewa qo sa qai vakavuna ga me ca sara na ituvaki.

E tuvanaka na valenivolavola ni tabana e Zimbabwe e lima na Komiti ni Vakacoko mera vukei kina na tacida. Kena ikuri, e tuvanaki sara na sala era rawa ni cautaka kina na dautukutuku na kakana kei na so tale na ka, ena rawa ni lai yaga vei ira na mataveitacini era vakaleqai. Era sa veisoliyaka tiko na Komiti ni Vakacoko na ka e cautaki qori.

Me yacova mai nikua, era sa veisoliyaka oti na Komiti ni Vakacoko vei ira na dautukutuku e 62,669 na kilokaramu na falawa e caka mai na sila, e 6,269 na lita na waiwai ni vakasaqa, e 3,337 na kilokaramu na ika e sigani kei na 5,139 na kilokaramu na bini.

Erau vakila tale ga na leqa ni kakana e dua na veiwatini rau vulica tiko na iVolatabu, rau sa dau sosoqoni tale ga. Na gauna sa kauta yani kina na kedrau na tacida tagane e dau vuli tiko kei rau, e tarai rau sara ga. Ni bera qori, a qiriti rau yani na italatala ni lotu rau dau lewena tu. E kere ilavo yani me lai voli kina na kena. Rau raica sara ga na veiwatini na kedra duidui na iVakadinadina i Jiova kei na italatala ya. Rau vakatulewataka me rau sa kere vakacegu mai na lotu qori.

Eda vakadeitaka ni na vakalougatataka tiko ga o Jiova na sasaga kece ena soli ni ka ni veivuke vei ira na tacida e Rwanda kei Zimbabwe.—Cakacaka 11:29.