Ni ririkotaki vakalevu na nodra bula na itabaqase ena vuku ni matedewa na coronavirus, era muria vinaka na vakatutu ni tabana ni bula na tacida itabaqase, ra qai tiko ga e vale. Ia era ogaoga tiko ga, nira vakayagataka na iyaya vovou mera tiko kina ena soqoni qai vakaitavi ena cakacaka vakaitalatala.

Kena ivakaraitaki, ni se bera ni tete na matedewa, sa tu ga i vale e dua na tacida yalewa yabaki 94 e Roma, Itali. A papitaiso ena 1952. E dau sarava na soqoni ena JW Stream, ia dua na gauna dede e sega ni raici ira tu na lewe ni nona ivavakoso. Ia nira sa tuvanaka ena gauna qo na qase ni ivavakoso na soqoni ena vidio, e rawa kina vua me raici ira na lewe ni nona ivavakoso, qai rogoca na nodra soqoni vata.

E dua tale na tacida o Sister Stephanie Aitken, mai Spanish Fork, Utah, Merika, e didivara qai tiko ena vale ni malumalumu e vakatabui tu kina na veisiko. E vukei koya e dua na qase ni ivavakoso kei watina ni rau biuta ena nona iyaya vakalivaliva na porokaramu ni qiri ena vidio. Rau cakava qori ena vosa vaGalu ni rau duri tu ga yani e tautuba ni lati ratou tu na iloilo. Ni sa biuta rawa ena nona iyaya vakalivaliva na porokaramu ya o Sister Aitken, e mokota na nona tablet ena levu ni nona marau. E vakavinavinakataka vakalevu ni se rawa tiko ga ni soqoni kei ira na lewe ni nona ivavakoso.

Nira vakayagataka na iyaya vovou na mataveitacini kei ira na itabaqase ni tete tiko na matedewa qo, eda lai vakasamataka kina na ka e yalataka o Jiova me baleti ira na nona tamata, nira na vakayagataka vinaka na “wainisucu ni veimatanitu.” (Aisea 60:16) Eda kila ni o Jiova ena tokoni ira tu ga na nona dauveiqaravi ena gauna dredre.