ME 9, 2022
IROGO MAI VEIYASA I VURAVURA

IROGO VOU—VESU ESO NA TACIDA | Ratou Vosota Rawa ena Veivuke i Jiova

SARAVA/ROGOCA

Ena ika6 ni Okotova 2022, e kaya na mataveilewai na Nakhimovskiy District Court of Sevastopol mai Rusia, ni ratou cala o Brother Vladimir Maladyka, Brother Vladimir Sakada, kei Brother Yevgeniy Zhukov. Ratou na vesu me ono na yabaki. Ni tau oti ga na lewa, ratou sa vesu sara.

Veitaravi ni Gauna

Okotova 1, 2020

Era vaqaqara na ovisa na FSB ena nodratou vale e ciwa na tacida e Sevastopol. E wili tale ga kina nodratou vale o Maladyka, Sakada, kei Zhukov. Ni caka na vaqaqara ena nodratou vale o Maladyka, era raica na ovisa e dua na pakete sucu pouta. Era kaya ni sucu pouta qori e vaka na irairai ni wainimategaga. Rau mani kau o Brother Maladyka kei watina o Nataliya me rau lai vakatarogi. Ena siga tiko ga ya, e sere o Nataliya. Ratou vesu vakawawa o Brother Maladyka, Brother Sakada kei Brother Zhukov. Ena siga tarava ratou kau i valeniveivesu
Maji 23, 2021

A sere mai o Brother Sakada qai vakatatabutaki i vale. E soli vua e dua na misini me dara tiko me rawa ni kilai na vanua e tiko kina. E vakatabui tale ga me vakayagataka na internet, talevoni, se veivosaki kei ratou na tacida ratou vesu vata
Maji 30, 2021

Sere mai o Brother Maladyka, qai vakatatabutaki i vale
Me 17, 2021

Sere mai o Brother Zhukov ni sivia e vitu na vula nona vesu tu, qai vakatatabutaki i vale
Seviteba 30, 2021

Ratou tekivu veilewaitaki

Kedratou iTukutuku

Vladimir Maladyka

Sucu: 1963 (Yenakievo, Ukraine)

Me baleti koya: Vica vata na yabaki nona mekeniki tu, qai dau vakavinakataka na waqavuka. Rau vakamau kei Nataliya ena 1986

E via kila eso tale na ka me baleta na Kalou ni oti nodrau sotava vakaveiwatini e dua na ituvaki dredre. Vukei koya o tacina me mai kila na ka dina. Rau papitaiso kei Nataliya ena 1997

Ka e Tukuna

Sala cava e veitokoni kina o Jiova ena nomu vuvale?

Gauna au vesu tu kina era veivuke vakayago na mataveitacini vei watiqu, ra vakacegui koya qai vakayaloqaqataki koya. Era dau qiri wasoma vua, text, se vakau kad mera kila se vakacava tiko. Eso era gole sara ga i vale mera vakayaloqaqataki koya, ra tokoni koya tale ga.

Era marautaka e levu na mataveitacini ena ivavakoso mera vukei koya. Dua na ka nodra yavala totolo mera tokoni keirau, era “duavata” kece mera veivuke.—Sefanaia 3:9.

Vladimir Sakada

Sucu: 1970 (Kyiv, Ukraine)

Me baleti koya: Vulica me dau vakayagataka na misini, a lewena tale ga na mataivalu. Cakacaka vakamatai tiko ena gauna qo. Rau vakamau kei Svetlana ena 2005

E sega ni vakabauta na Kalou. Via kila na ka me baleta na iVolatabu ni oti nona vakaraitaka vua e dua nona itokani na yaca ni Kalou. E mareqeta na ivakasala yaga ena Vosa ni Kalou. Papitaiso sara ena 1991

Ka e Tukuna

E yaga vakacava vei kemudrau vakaveiwatini nomudrau muria e dua na ituvatuva vinaka vakayalo?

E veisemati kece tiko na noda ituvatuva vakayalo. Era cakacaka vata me vaka ga e dua na yago. Koya gona, keirau na dau vakavakarau vinaka qai vakaitavi ena soqoni kei na cakacaka vakavunau. Keirau masu, vuli vakataki keirau qai veimaliwai kei ira na tacida . . . Dina ni vakatabui tu na noda cakacaka, ia keirau qara tiko ga na sala me keirau yalodina vei Jiova, qai dei ena neirau ituvatuva vakayalo.

Yevgeniy Zhukov

Sucu: 1969 (Sevastopol, Crimea)

Me baleti koya: Susu ena vuvale levu. Ni yabaki 14, sa mate o tamana

Ni se itabagone, e vulica na taba piano ena koronivuli ni ivakatagi. Vulica na sema paipo, qai cakacaka ena dua na kabani

Oti nona lewena na mataivalu, e via kila na inaki ni bula. E vakaraitaka vua o tinana na kena isau mai na iVolatabu. Papitaiso sara ena 1997

Ka e Tukuna

E vukei iko vakacava o Jiova ena gauna o vesu tu kina?

[Ena itekitekivu ni 2021,] au leqataka na sala meu vakananuma kina na iVakananumi. Ya se qa imatai ni gauna meu cakava duadua kina. Au masu vei Jiova, e sauma na noqu masu ni solia vei au na vuku kei na kaukaua. Ena nona veivuke, au vakananuma na soqo bibi qori kei na rua tale keitou vesu vata, au solia tale ga na ivunau ni iVakananumi. Qori e dua na ivakadinadina levu vei rau.

Eda nuidei ni o Jiova ena vakadeitaki ratou na tacida qori, kei ira kece era vakacacani tiko e Crimea.—1 Cesalonaika 3:12, 13.

Rawa ni o Wilika Tale ga

ITUKUTUKU VOU

Vesu ena Vuku ni Nodra Vakabauta—⁠Crimea

Era vesu ena vuku ni nodra vakabauta na iVakadinadina i Jiova mai Crimea. Vulica na kedra itukutuku, qai tabaka (print) tale ga na lisi ni yacadra na iVakadinadina i Jiova era vesu tiko ena gauna qo.

ITUKUTUKU VOU