Na tete ni matedewa na coronavirus (COVID-19), e tarai ira e vica vata na milioni na iVakadinadina i Jiova nira saga mera muria na veidusimaki ni matanitu ra qai tomana tiko ga nodra ituvatuva vakayalo. Mera vunau tiko ga na tacida ena yalava e tete kina na matedewa qori, era vakayagataka eso tale na iwalewale ni vunau.

E kaya e dua na tacida tagane mai Pisa, e Itali: “E vuavuaivinaka sara ga neimami cakacaka vakavunau! Ni levu era sa tu ga e vale, keirau mani tuvanaka vakaveiwatini me keirau qiriti ira ena vidio o ira e tiko vei keirau na nodra naba ni talevoni. Levu dina na neirau vuli iVolatabu kei na veisikovi lesu, o ira keirau sa qai vosa vakadua vei ira kei ira keirau sa sotavi ira oti. E vuavuaivinaka dina.”

Na tete ni matedewa qo e uqeti ira sara ga na mataveitacini e Sauca Korea mera vakayagataka vakalevu na ka e vakarautaki ena noda website kei na JW Library. Kena ivakaraitaki, e kurabuitaka e dua na tacida tagane ni text yani vua e dua rau a vuli iVolatabu vata tu ena tolu na yabaki sa oti. E kaya o koya ni matedewa qo e vakasamataka sara ga kina vakalevu na ivakatakilakila ni otioti ni veisiga. E mani imelitaka vua na tacida tagane na itukutuku me baleta na iotioti ni veisiga ena JW Library. E kaya na tacida qori “ni veiuqeti sara ga na kena yaco na ivakatakilakila ni iotioti ni veisiga, e uqeti ira e levu mera kila e levu tale na ka me baleta na Kalou kei na iVolatabu.”

E laurai ena levu na ripote ena valenivolavola ni tabana e veiyasa i vuravura, nira kauaitaka vakalevu na tacida na cakacaka vakavunau. E totoka dina nida raica nodra “yalomatua” tiko ena sala era vunautaka tiko kina na itukutuku vinaka.—Maika 6:9.