Ena ika26 ni Epereli 2022, e gole i Poladi o Brother Mark Sanderson, e lewe ni iLawalawa Dauvakatulewa ni iVakadinadina i Jiova. Me vakayaloqaqataki ira na mataveitacini era vakaleqai ena ivalu e yaco tiko mai Ukraine.

Ena ika30 ni Epereli 2022, era sureti na ivavakoso kece e Poladi kei Ukraine mera rogoca na ivunau lavotaki. O ira na tacida era dro laivi mai Ukraine kei ira na tacida e Poladi era veivuke tiko ena leqa qo, era rogoca na ivunau qori ena Vale ni Soqoni Lelevu e Warsaw, e Poladi. Na kedra iwiliwili kece e sivia tiko na 250,000 okati kina o ira na sema mai ena internet.

E kaya o Brother Sanderson: “Dua na ka na nodra nanumi kemuni na mataveitacini e veiyasa i vuravura, era masulaki kemuni tale ga. O ira tale ga na tacida ena itikotiko liu, era dau nanumi kemuni ena masu kei ira na tacida e Rusia. Keitou dau masulaki kemuni tale ga na iLawalawa Dauvakatulewa.” E vakadeitaka o Brother Sanderson vei ira na tacida “ni ituvaki dredre era sotava e sega ni kena ibalebale ni o Jiova e sega vakadonui ira. E lomani ira vakalevu o Jiova, e raica na ka era sotava tiko, e volekati ira tale ga na sotava tiko na ituvaki dredre.”

E vakauqeti ira o Brother Sanderson: “Me dei tiko ga nomuni veiwekani kei Jiova. Eda sega ni vinakata ga meda vakabulai, ia eda vinakata me qaqaco noda vakabauta da qai kabiti Jiova tiko ga ena gauna dredre va qo. Qori na ka e vakavulici keda kina o Jiova.”

O Serhiy, e dua na qase ni ivavakoso e Odessa mai Ukraine. E kaya: “Vica na macawa sa oti, au sega ni moce vinaka niu lomaleqa qai lomaocaoca vakalevu. Ia [na ivunau lavotaki qo] e vaqaqacotaka dina noqu vakabauta ni o Jiova e sega ga ni kauaitaki keda vakailawalawa, ia e kauaitaka keda yadua sara ga.”

O Tatiana, e dua na tacida yalewa a dro laivi mai Kyiv e Ukraine. E kaya: “Au vakila ni volekati au o Jiova, e lomani au tale ga. E vaka ga e mokoti au tu. Se mani vanua cava eda tu kina, ena sega vakadua ni biuti keda o Jiova.”

Eda nanumi ira vakalevu na tacida qori. Eda nuidei tale ga ni na uqeti ira na ivunau lavotaki qori mera nanuma tiko na “dei ni nona loloma” o Jiova vei ira na nona tamata.—Same 136:1.