E dua na soqo bibi duadua vei ira na iVakadinadina i Jiova e veiyabaki na iVakananumi ni nona mate o Jisu. Ena yabaki qo, era na vakananuma tiko ena Tusiti, na ika7 ni Epereli e milioni na iVakadinadina kei ira na tataleitaki. Ia e duatani duadua na iVakananumi ena yabaki qo ni levu e veiyasa i vuravura era na qiri ena vidio mera soqoni kina. E caka qori ena vuku ni matedewa na COVID-19.

Era vakatabuya kina na vakailesilesi ena levu na vanua na soqoni vakalewelevu. Ya na vuna era soqoni kina e veimacawa e levu na ivavakoso e veiyasa i vuravura nira vakayagataka na vidio. Era na vakayagataka tale ga na iwalewale qori ena iVakananumi. E vakarautaki e dua na vidio katoni ena jw.org vei ira na vo ni lewenivanua.

Ena yabaki sa oti, era tiko ena iVakananumi e sivia ni 20 na milioni. E nuitaki nira na sema tale ga yani ena yabaki qo e milioni, ena vidio, talevoni se ra sarava na vidio katoni ena jw.org.

E tete tiko ga na matedewa qo ena levu na vanua, e ririkotaki kina na nodra bula e levu. Mera taqomaki na tacida, e bibi mera muria tiko ga na veidusimaki ni matanitu me yacova na gauna sa oti kina na matedewa qo. Ia nida nuitaka tiko ga na veitokoni i Jiova, eda vakadeitaka meda muria na ka e vakarota o Jisu oya meda ‘dau cakava qo, meda vakananumi koya kina.’—Luke 22:19.