Ena yabaki vakacakacaka ni 2020, e qarava na noda isoqosoqo e dua na cakacaka levu ni vakacoko. E tuvanaki e veiyasa i vuravura e sivia e 950 na Komiti ni Vakacoko (DRC). Me ikuri ni matedewa, e yaco tale ga e levu na leqa tubukoso. Koya gona, me qaravi na vakacoko ena vinakati me muri na vakatatabu ni COVID-19. Era kaya na mataveitacini era mai veivuke ni qo e vaqaqacotaka nodra vakabauta. Qo eso na leqa tubukoso e tarai ira na mataveitacini:

Ena yabaki vakacakacaka ni 2020, e tarai ira na tacida e 126 na cagilaba kaukaua. E tubu ena 11.5 na pasede na iwiliwili ni cagilaba mai na yabaki vakacakacaka ni 2019. E levu kina na vakacaca ni waluvu kei na sisi ni qele.

Kena ivakaraitaki, e vica vata na cagilaba e ravuta na Yatu Filipaini, e vakavuna mera tokitaki e levu na tacida.

Na bi ni uca mai Nigeria e vakacacana nodra iteitei na tacida.

Mai Sauca Korea e vakacaca vakalevu na cagi kaukaua, kei na waluvu (monsoon).

E levu na vanua e kama, eso era vakacaca sara vakalevu.

Kena ivakaraitaki, eso na tacida era tiko ena vanua e vakacaca sara ga kina vakalevu na kama. E rauta ni dua na milioni na eka ni vanua e vakacacani.

Qori na ka a yaco mai Merika.

A yaco tale ga na kama vakadomobula mai Ositerelia, ena levu na vanua era tiko kina na tacida.

Ni oti na leqa tubukoso, e vakarautaka na isoqosoqo na idusidusi mera qaqarauni kina mai na matedewa o ira na tacida era veivuke kei ira na vukei.

E vakamacalataka o Brother Han Chan-hee, ena tabana ni vakacoko mai Sauca Korea, eso na sala mera qaqarauni kina na tacida: “Ena veimataka ena tauri kece na neimami ivakarau ni katakata. Keimami sega ni veivolekati (social distancing), e yalani ga na kedra iwiliwili na mai veivuke, keimami sega tale ga ni sota me keimami kana vata se veitalanoa. E dau vakawainimatetaki tale ga na iyaya ni cakacaka kece, ni bera ni tekivu na cakacaka kei na gauna e oti kina.”

Eso na tacida e vakacacani nodra vale ena leqa tubukoso, eso tale era tokitaki. E kaya o Brother Chris Shirah, a veivuke ena vakacoko ena kama mai West Coast, Merika: “E lewai vinaka sara na veivakaicilitaki me rawa ni muri tiko ga na vakatatabu ni COVID-19.”

Ena levu na vanua, era sega ni rawa ni veivuke ena vakacoko e levu na tacida baleta ni tiko na vakatatabu ni veitosoyaki kei na qaqarauni. E kaya o Brother Philips Akinduro, a veivuke ena vakacoko mai Nigeria: “Dua na ka e vakadredretaka vakalevu na vakacoko na vakatatabu ni veitosoyaki [e biuta na matanitu]. E dredre gona mera mai veivuke e levu na tacida.”

E vakamacalataka o Brother Kim Joon-hyeong, a veivuke ena vakacoko mai Sauca Korea, na nodra ivakaraitaki na tacida era mai veivuke: “Na noda vakacoko e yavutaki ena noda lomana na Kalou kei ira na tacida, keimami dau raica gona vakabibi na bula kei na qaqarauni ena gauna ni vakacoko. Dina ni tu na vakatatabu, ia keimami marau tiko ga ena neimami veivuke ena vakacoko.”

Dina ni sotavi tu na ituvaki dredre, na qaravi vinaka ni vakacoko e vaqaqacotaka nodra vakabauta na vakaitavi, kei na nodra nuitaki Jiova.

Kena ivakaraitaki, e leqataka o Brother Han ni sa rui lekaleka na gauna, ena sega ni veirauti na iwiliwili ni tacida mera mai veivuke ena vakacoko. E kaya: “Au lomaleqa sara ga, ia ena loma ga ni vica na aua dua na ka na levu ni tacida era bolecakacaka mai na veivanua. Eso mada ga keitou sa sega ni qai vakadonuya ni sa rui sivia tale. E uqeti au sara ga niu vakila nona veitokoni o Jiova.”

E va tale ga qori na ka e vakila o Brother Brad Benner mai Honduras, ni oti nona veivuke ena vakacaca ni cagilaba. E kaya: “E sega ni rawarawa na ituvaki, ia e vakarautaki na kakana vei ira na tacida era tokitaki, vanua mera tiko kina, era vakayaloqaqataki tale ga. Au vakadinadinataka noda veilomani tiko ga ena isoqosoqo, dina ga ni ravuravu e rua na cagilaba qai veitauvi tu na matedewa e veiyasa i vuravura.”

E kaya o Brother Alquin Dayag, a veivuke ena vakacoko mai na Yatu Filipaini: “Au raica ena veika kece qo ni o Jiova e tu vakarau me dau solia vei keda na kaukaua e uasivia na kaukaua ni tamata, kei na vuku meda qarava kina na itavi.”—2 Korinica 4:7.

Eda vakavinavinakataka nodra cakacaka vakaukaua ena veivalenivolavola ni tabana, na Komiti ni Vakacoko, kei ira kece na tacida era veivuke kina. Dua na veivuke levu e rawati ena cau kei na nodra loloma na tacida era bolecakacaka ena yabaki qori, ena gauna e levu duadua kina na leqa tubukoso.—1 Cesalonaika 1:3.