Ni tete tiko na matedewa na coronavirus, era vunau tiko ga na itabagone e veiyasa i vuravura nira vakayagataka eso tale na iwalewale, ra qai veivakayaloqaqataki vei ira na tacida.

Kena ivakaraitaki, era dau biuta na lewenivanua e Niusiladi na matakau kei na iyaloyalo ena nodra katubaleka mera raica na gone nira tavali. Ra qai cakava tale ga qori na itabagone ena so na ivavakoso nira raica ni iwalewale vinaka ni vunau. Era mani vakabira na kedrau itaba o Kelepi kei Sofia ena katubaleka, ra qai vola kina “Watch me on jw.org.”

O Emilia, e dua na itabagone yabaki ciwa mai Suwitisiladi, e malumalumu tu na sotia ni yagona. Ia e volavola vei ira na tu ena vale ni malumalumu e vakatabui kina na veisiko. E droinitaki Noa tale ga kei na waqa qai vakamacalataka na nodratou taqomaki vakavuvale ena loma ni waqa ni ratou tiko ga vakadua. E uqeti ira ena vale ni malumalumu o Emilia “mera tiko ga vakadua e vale me vakataki Noa.” E vinakata me sikovi ira ni sa oti na vakatatabu ni matedewa.

Levu era volavola mai vua, e mani volavola lesu o koya. E qai vola e dua na dauvolaitukutuku ena niusipepa na ka e cakava o Emilia.

Rua na itabagone yalewa mai Ontario, Kenada o Peyton kei Ella Kempf, rau veivosaki tiko ga kei ira na mataveitacini ena ivavakoso ni tete tiko na matedewa. E kaya o Jared na tamadrau: “Ena neitou sokalou vakavuvale, rau na vola kece na yacadra na tacida me keitou na qirita.” Sa qai tomana na tinadrau o Jessica: “Keirau via vakavulici neirau goneyalewa me rau kila ni bibi nodra kauaitaki na mataveitacini kei ira na wekai keitou.”

Rau cakava tale ga qori o Stella e yabaki ciwa kei tinana mai Colorado, e Merika ni rau vola kece na yacadra na itabaqase ena ivavakoso, rau qai qiriti ira.

Mai Arizona, rau veiqaravi tiko ena ivavakoso vakaJaina o Jonathan e yabaki 12 kei Sean McKampson e yabaki 15, kei na nodrau itubutubu. Rau vunau tiko ga ni rau vola ivola ena veimataka ni bera ni rau lai vuli. E vinakati dina na gauna kei na sasaga me rau vakaotia na nodrau vola ni rau se vuli vosa tiko. Ia rau se wasea tiko ga na itukutuku ena iVolatabu vei ira na vosa vakaJaina.

E dua na tacida yalewa e ono na luvena, ratou tiko ena yabaki 2 ina 15. Ratou dau sikova vakaveitinani e dua na vale ni malumalumu ena muaira kei Michigan, kei na dua tale na tacida yalewa painia. Ena vuku ni matedewa na coronavirus, era vakatabuya kina na vakailesilesi na veisiko. Sa qai vakauta o nodratou itubutubu vei ira ena vale ni malumalumu e dua na vidio e vakaraitaki kina na nodratou lagata tiko na sere ni isoqosoqo na gone, kei na wiliki ni tikinivolatabu. E kaya vei tamadratou e dua e veiqaravi ekea, ni a yalolailai e dua na itabaqase ni sarava oti na nius ena levu ni tamata era mate tiko ena matedewa na coronavirus. Ia ni sarava oti ga na vidio rau vakauta yani ya, e vakacegui koya sara ga.

Eda kila ni mareqeta o Jiova nodra sasaga na itabagone qori nira lomani ira na lewenivanua, ra qai vakacaucautaki koya ena nodra iwalewale vou ni vunau.—Same 148:12, 13.