Sa lima na yabaki noda marautaka tiko na mataveitacini e vuravura raraba, na porokaramu vakayalo e vakarautaki e veivula ena JW Broadcasting. Nida rai vakanamata ena ituvatuva ni yabaki vakacakacaka ni 2020 kei na veigauna se bera mai, raica mada qo eso na cavuikalawa vakatubuqoroqoro sa rawati me tekivu ena Okotova 2014, na imatai ni gauna e vakaraitaki kina na JW Broadcasting.

Vakadewataki ena 185 na vosa. A vakavalagi tu ga na broadcasting ena gauna e tauyavu kina. Ia ena Me 2015, e vakadonuya na iLawalawa Dauvakatulewa me vakadewataki ena 40 tale na vosa. Oti e va na yabaki, sa vakadewataki ena 185 na vosa.

Vinakati e vuravura raraba. Na porokaramu qo e baleti keda na mataveitacini e vuravura raraba, levu tale ga na vidio sa katoni e veiyasa i vuravura. Dau tini noda porokaramu qo ena dua na vidio ni ivavakoso ena vanua tu yawa, okati kina o Iciopea, Iceland, Mongolia, Saipan, Tuvalu, kei Uganda. Na veika e laurai ena JW Broadcasting e saravi ena 230 na vanua, okati kina eso na vanua lalai era tu sara vakayawa, me vaka na yanuyanu o Heard kei McDonald, e sega ni dua e tawana tu na rua na vanua qori. Ena imatai ni vula e vakaraitaki kina na porokaramu qo, e rauta nira le 8.6 na milioni era sarava, kei ira na download.

Levu na ka vinaka e saravi kina. E sivia na 60 na aua na levu ni veika vovou e vakaraitaki kina, okati kina na vunau, nodra vakatarogi eso, kedra italanoa ni bula eso, veika vovou e yaco kei na drama. Na imatai ni sere vou e vakarautaki kina oya, The Best Life Ever. Sa katoni tiko e veivula na sere salavata kei na kena vidio. E vakadewataki na sere qori ena 368 na vosa.

Koya e liutaka na veivosaki. Ena liutaka tiko na veivosaki ena porokaramu yadua, e dua na lewe ni iLawalawa Dauvakatulewa. Toso na gauna era vakayagataki tale ga na dauveivukei vei ratou na lewe ni iLawalawa Dauvakatulewa, me ratou veivuke se liutaka na veivosaki ena broadcasting. Era le 29 na tacida tagane era lesi mera liutaka na veivosaki, se veivuke ena broadcast ni veivula.

Vakavinavinaka. E dua na tacida tagane mai Merika e mate tu e dua na yasa ni yagona, e vakavuna tale ga na malumalumu ni yagona. E kaya me baleta na sere vovou: “E veivakauqeti na sere totoka, e vukei au tale ga meu vosota na ituvaki dredre au sotava tiko. Au qoroya na kena vukei au na sere vovou qori meu vakavinakataka noqu itovo vaKarisito. Vinaka vakalevu na isolisoli totoka qo!”

Dua na veiwatini mai Merika e takali na luvedrau tagane, oti ga nodrau sarava na broadcast ni Noveba 2016, rau kaya: “E tuturu na wai ni matai keirau, ni keirau sarava tiko na vidio ni sere Sa Voleka Sara. Keirau vakataki rau sara ga na itubutubu rau marautaka tiko na bula ena parataisi. Eso na gauna niu sega ni taqea rawa na vusolo ni lomaqu, ena vakarautaka o Jiova na sala me keirau vakacegui kina. E sauma sara ga o Jiova ena vidio qo na neirau dau masu mai vu ni loma i keirau.”

Rau vakavinavinakataka tale ga na broadcast e veivula, e dua na veiwatini mai Ukraine: “Vinaka vakalevu na JW Broadcasting, e vaka ga ratou lewe ni neitou vuvale na lewe ni iLawalawa Dauvakatulewa!”

Eda vakavinavinaka vei Jiova ena iloloma veiganiti qori, e vakaduavatataki keda nona tamata e vuravura raraba.—1 Pita 2:17.