Ni tete tiko na matedewa e veiyasa i vuravura, era sevutaka tiko ga na iVakadinadina i Jiova na iVolatabu ena so tale na vosa. Ena June 28, 2020, e sevutaki na New World Translation of the Holy Scriptures ena va na vosa: Swati, Tsonga, Zulu, kei na Chitonga. E sevutaki tale ga na New World Translation of the Christian Greek Scriptures ena vosa vakaBelize Kriol kei na Totonac. Era sega ni soqoni vata na mataveitacini ena vuku ni COVID-19, ia era marau mera ciqoma nodra iVolatabu ena iyaya vakalivaliva. Era sevutaki na iVolatabu qo ena vunau katoni ra qai sarava na dautukutuku na kena porokaramu nira sema ena vidio.

E sevutaka o Brother Geoffrey Jackson, e lewe ni Lawalawa Dauvakatulewa na New World Translation of the Holy Scriptures ena vosa vakaSwati kei na vakadewa vakavoutaki ni New World Translation of the Holy Scriptures ena vosa vakaTsonga kei na vakaZulu ena iyaya vakalivaliva (raica na imatai ni itaba). Era sema mai ena soqoni lavotaki qo na dautukutuku e Sauca Aferika kei Eswatini.

Ena yalava e qarava na valenivolavola ni tabana e Sauca Aferika, e rauta ni 18.5 na milioni na lewenivanua era vosa vakaSwati, vakaTsonga, kei na vakaZulu, era okati tiko kina e sivia ni 38,000 na dautukutuku.

O Brother Augustine Semo, e lewe ni Komiti ni Tabana e Malawi, e sevutaka na New World Translation of the Holy Scriptures ena vosa vakaChitonga (Malawi).

E vakadewataka na iVolatabu vou qo ena vosa vakaChitonga e dua na timi me sivia ni rua na yabaki. E kaya e dua na dauvakadewa: “E tolu na vosa lalai ena vosa vakaChitonga. Na vosa e vosataki ena dua na yasana ena sega ni kilai ena dua tale na yasana. Keitou qarauna me vakayagataki na vosa era kila e le levu. Keitou vakayagataka tale ga na ivakamacala e ra me vakamatatataka na vosa ena rairai sega ni kila o koya e wiliwili.”

E kaya e dua tale na dauvakadewa: “Era na taleitaka na dautukutuku mera vakayagataka na iVolatabu qo ena cakacaka vakaitalatala se na soqoni. E rawarawa qai matata na vosa e vakayagataki kina, e rawarawa gona na kena wiliki kei na kena kilai.”

E sevutaka o Brother Joshua Killgore, e lewe ni Komiti ni Tabana e Merika e Loma, na New World Translation of the Christian Greek Scriptures ena vosa vakaBelize Kriol. Era sema mai ena porokaramu qori e sivia ni 1,300 na lewenivanua.

Eratou cakacaka vata e le ono na dauvakadewa me 16 na vula me vakadewataki na iVolatabu. E kaya e dua vei ratou me baleta na ivakadewa vou: “Sa ra qai taura qo na mataveitacini e dua na ivakadewa ni iVolatabu e donu qai nuitaki. Ena vaka na cina ena vakararamataka na nodra vakasama.”

E kaya e dua tale na dauvakadewa, “Ni tete tiko na matedewa na COVID-19, sa rawa nira wilika na iVolatabu ena nodra vosa na tacida era vosa vakaBelize Kriol. Qo ena vakacegui ira qai vukei ira mera vosota na leqa era na sotava ena veigauna se bera mai.”

E tiko e Belize e 867 na dautukutuku, era lewena e 19 na ivavakoso e vosa vakaBelize Kriol. Kena ikuri, e 58 na dautukutuku era veiqaravi ena yalava e Merika ena vosa vakaBelize Kriol.

E sevutaka O Brother Jesse Pérez, e lewe ni Komiti ni Tabana e Merika e Loma, na New World Translation of the Christian Greek Scriptures ena vosa vakaTotonac. Era sema mai ena porokaramu e rauta ni le 2,200. Era lewena e 50 na ivavakoso vosa vakaTotonac e tiko ena yalava.

Mai vakaoti na vakadewataki ni iVolatabu qo ni oti ga e tolu na yabaki. Ena veivuke sara vakalevu na ivakadewa qo ena vunautaki ni itukutuku vinaka vei ira e sivia ni 250,000 era vosa vakaTotonac e Mexico.

Na New World Translation of the Christian Greek Scriptures e sega ni vaka eso tale na iVolatabu vakaTotonac. E kaya e dua na dauvakadewa, “E vakayagataki kina na vosa ni veisiga, sa qai rawarawa qo vei keimami me keimami vakamacalataka na ulutaga vakaivolatabu vei ira ena yalava.”

E kaya e dua tale e lewe ni timi ni vakadewa: “Era diva tu na mataveitacini me dua na iVolatabu va qo. E liu eso na dautukutuku era dau vakadewataka ga ena vosa vakaTotonac na tikinivolatabu mai na iVolatabu vakaSipeni, nira lesi ena dua na itavi ena soqoni ena lomanimacawa. Ia sa ra na sega ni cakava qori nira vakayagataka na iVolatabu vaKirisi.”

Dua na ka e talei kina na ivakadewa vou qo ni tiko na kena ivakamacala e ra, e volai kina eso na vosa veiwekani ni vosa e basika ena tikinivolatabu. Na vosa veiwekani qori e vakayagataki ena so tale na vosa vakaTotonac, era na taleitaka na vakadewa qo o ira kece na vosataka na vosa vakaTotonac.

Eda marau vata kei ira na tacida era taura na iVolatabu qo ena nodra dui vosa. Eda kila ni na vakadeitaki na nodra vakabauta nira vakayagataka nodra ‘iseleiwau vakayalo’ ena nodra cakacaka vakaitalatala kei na nodra vuli vakataki ira.—Iperiu 4:12.