Ena imatai ni Seviteba 2024, a caka na Soqo ni Veiwasewase “Tukuna na iTukutuku Vinaka!” e Roma mai Itali. A sevutaka kina o Brother Massimiliano Bricconi, e lewe ni Komiti ni Tabana e Itali na ivakadewa taucoko ni New World Translation of the Holy Scriptures ena vosa vagalu vakaItali. Era tiko kina e rauta ni le 854. Sa rawa tale ga ni download ena jw.org, kei na JW Library Sign Language.

Qo na imatai ni ivakadewa taucoko ni iVolatabu ena vosa vagalu vakaItali. Ena 1998, era tekivu tabaka na tacida na ivola vakaivolatabu ena vosa qori. Nikua, e le 845 na mataveitacini era veiqaravi tiko ena 15 na ivavakoso vosa vagalu vakaItali, 12 na iwasewase lailai, kei na 10 na iwasewase vovou e Itali.

Ena ika6 ni Seviteba 2024, a caka na Soqo ni Veiwasewase “Tukuna na iTukutuku Vinaka!” e Hoima mai Uganda. E sevutaka kina o Brother Frederick Nyende, e lewe ni Komiti ni Tabana e Uganda na ivola i Maciu, Marika, Luke, kei Joni ena vosa vakaRutoro. E rauta ni le 928 era taura nodra ilavelave tabaki The Bible​—The Good News According to Matthew. Sa rawa tale ga ni download na va na Kosipeli qori ena jw.org, kei na JW Library.

E rauta ni le 2.2 na milioni era vosataka na vosa vakaRutoro se vosa vakaRunyoro e Uganda. Rau via tautauvata tiko ga na rua na vosa qori. E levu na vakadewa ni iVolatabu ena vosa qori e sega ni vakayagataka na yaca ni Kalou o Jiova. Ia e donu, matata, qai kilai rawarawa na vakadewa ni va na Kosipeli qo. Era marautaka gona na le 374 na tacida ena rua na ivavakoso vosa vakaRutoro, kei na va na ivavakoso vosa vakaRunyoro mera vakayagataka ena cakacaka vakavunau kei na soqoni.

Ena ika8 ni Seviteba 2024, a caka e dua na soqo lavotaki ena valenivolavola ni tabana e Almaty e Kazakhstan. E sevutaki kina na ivola i Maciu ena vosa vakaUighur (Arapea), kei na vakaUighur (Cyrillic). Era tiko ena soqo e rauta ni le 483. Sa rawa ni download tale ga na ivola qori ena jw.org, kei na JW Library.

E levu na vakadewa ni iVolatabu vosa vakaUighur (Arapea) kei na vakaUighur (Cyrillic), e vakayagataka na vosa makawa qai dredre mera kila na dauwiliwili. Na gauna qo e rauta ni le 11 na milioni era tiko e Esia era vosataka na vosa vakaUighur. Ia eso tale era tiko e Aferika, Urope, kei Noca Amerika.

Ena ika13 ni Seviteba 2024, a caka na Soqo ni Veiwasewase “Tukuna na iTukutuku Vinaka!” e Bwera mai Uganda. E sevutaka kina o Brother Moses Oundo, e lewe ni Komiti ni Tabana e Uganda, na ivola i Maciu, Marika, Luke, kei Joni ena vosa vakaLhukonzo. Era tiko kina e le 925 ra qai yadua kece na ilavelave tabaki ni ivola, The Bible​—The Good News According to Matthew. Sa rawa ni download tale ga na va na Kosipeli qori ena jw.org, kei na JW Library.

E voleka ni dua na milioni era vosataka na vosa vakaLhukonzo e Uganda. Ena 2001, era tekivu vakadewataka na tacida na ivola vakaivolatabu ena vosa qori. Nikua, era le 324 na tacida era veiqaravi tiko ena ono na ivavakoso vosa vakaLhukonzo.

Ena ika15 ni Seviteba 2024, a caka e dua na soqo lavotaki ena Vale ni Soqoni Lelevu e Johnsonville, e Liberia. E sevutaka kina o Brother Jethro Barclay, e lewe ni Komiti ni Tabana e Liberia, na ivola i Maciu kei Marika ena vosa vakavalagi ni Liberia. Era tiko ena soqo qori e le 1,176. Era sema tale ga kina ena internet na ivavakoso kece era vakayagataka na vosa qori. Sa rawa tale ga ni download ena iyaya vakalivaliva kei na kena katokatoni ena jw.org, kei na JW Library. Ena qai vakarautaki malua na ilavelave tabaki ni ivola, The Bible​—The Good News According to Matthew.

Eso na ivola ena iVolatabu sa tiko na kena katokatoni ena vosa vakavalagi ni Liberia. Ia qo e imatai ni gauna me sevutaki kina e dua na iwase ni Vosa ni Kalou ena vosa qori. E rauta ni le 1.6 na milioni era vosataka na vosa qori, wili kina e le 7,034 na tacida ena 120 na ivavakoso.

Ena ika20 ni Seviteba 2024, e caka na Soqo ni Veiwasewase “Tukuna na iTukutuku Vinaka!” ena Vale ni Soqoni Lelevu e Guerrero mai Mexico. A sevutaka ena siga qori o Brother Lázaro González, e lewe ni Komiti ni Tabana e Merika e Loma na ivola i Maciu, Marika, Luke kei Joni ena vosa vakaNahuatl (Guerrero). Era tiko kina e le 769. Era sema tale ga kina ena internet e le 742, mai Tlapa de Comonfort, e Mexico. O ira kece na tiko ena soqo era yadua na ilavelave tabaki ni ivola, The Bible​—The Good News According to Matthew. Sa rawa tale ga ni download na va na Kosipeli qori ena jw.org kei na JW Library.

E rauta ni le 250,000 era vosataka na vosa vakaNahuatl (Guerrero) e Mexico. Ena 1987, e tauyavu na imatai ni ivavakoso ena vosa qori. Nikua, era le 1,216 na tacida era veiqaravi tiko ena 37 na ivavakoso, kei na 2 na iwasewase lailai.