E sevutaka na iVakadinadina i Jiova na website vou, na JW Stream–Studio. E rawa ni saravi kina na soqo ni tabacakacaka, kei na ivakatawa ni tabacakacaka ena gauna sara ga e caka tiko kina (live). Ena ika6 kei na ika7 ni Maji 2021, e vakayagataki na iwalewale qo, ena 340 na soqo ni tabacakacaka e veiyasa i vuravura. Era sarasara kina e sivia ni 500,000.

Ni se qai tekivu ga na matedewa, e veidusimaki na Komiti ni Veivakavulici ni iLawalawa Dauvakatulewa, me ratou cakava na Tabana ni Broadcasting ena itikotiko i liu e dua na website vou. Me rawa nira tuvanaka kina na ivakatawa ni tabacakacaka na soqo ni tabacakacaka. Na website qori mera sarava kina na noda soqo, e vica vata na udolu ena gauna sara ga e caka tiko kina.

E qai lesia na Tabana ni Broadcasting e vica na tacida tagane, kei na yalewa mera cakava na website qo. E tiko eso na ka dredre me ratou walia ni caka tiko na website qori.

Kena ivakaraitaki, ena vinakati me rawarawa na website qori nira na vakayagataka tiko na tacida e duidui nodra kila na ka vakalivaliva. Me rawa tale ga ni vakayagataki ke berabera na Internet. Erau cakacaka vata na Tabana ni Broadcasting, kei na Tabana ni Kompiuta ena itikotiko i liu, me vakarautaki e levu na kompiuta me baleta na website qo. Ni levu era na vakayagataka tiko ena dua vata ga na gauna.

E tukuna o Alex Hernandez ena Tabana ni Broadcasting, “E ka ni sasaga na kena caka e dua na website me kaburaka e vica vata na udolu na soqo ni tabacakacaka ena dua ga na gauna. Ia qo e dua dina na ka marautaki. E tiko e dua na timi lailai era kenadau ena porokaramutaki ni kompiuta. Ia e levu e se qai imatai ni gauna, mera cakava kina e dua na website va qori.”

A tekivu vakaoti na website na JW Stream–Studio ena Me 2020. Oti ga e lima na vula ena Okotova 2020, era vakatovotovotaka na Tabana ni Broadcasting na website qo, kei na nodra veivuke na ivakatawa ni tabacakacaka mai na ono na vanua. Qori me ratou kila kina na tabana ni Broadcasting, eso na ka me vakavinakataki ni bera ni vakayagataki ena soqo ni tabacakacaka. Era veivuke e 17 na mataveitacini ena kena vakavinakataki na website.

E kaya o Alex: “Ke basika e dua na leqa, keitou na masulaka vei Jiova. Ia ni wali na leqa qori, keitou vakadinadinataka sara ga kina nona veitokoni o Jiova.”

Levu na tacida era vakavinavinakataka na website vou qo.

E kaya o Brother Jairo Espinosa mai Colombia: “Keimami vakadinadinataka sara ga na kena saravi na soqo ni tabacakacaka ena JW Stream–Studio, e vakilai kina noda duavata vaKarisito, keimami veivolekati tale ga kina vakamataveitacini. Ni keimami kila ni caka sara tiko ga ena gauna ya na soqo, e uqeti keimami me keimami vakarorogo vagumatua. Keimami sega sara ga ni via calata e dua na ka, qo e dua na sala keimami vakalougatataki kina!”

E kaya o Sister Magaly Reymundo mai Merika: “Au kila ni na tautauvata na porokaramu, kei na kena sa katoni rawa tu. Ia au taleitaka vakalevu noqu raica ni so na tacida au kila era vunau sara tiko ga ena gauna vata ga ya.”

Me tekivu mai na gauna e vakayagataki kina na JW Stream–Studio, sa saravi oti kina e sivia ni 800 na soqo ni tabacakacaka. Eda vakavinavinakataki Jiova ni vakarautaka e dua tale na sala qo, meda kaukaua tiko ga kina vakayalo, da qai duavata.—Same 133:1.