12 EPERELI, 2022
IROGO MAI VEIYASA I VURAVURA
Sevutaki na New World Translation ena Nodra Matanivola na Mataboko
Ena vica na vula sa oti, e sevutaki na New World Translation of the Holy Scriptures ena nodra matanivola na mataboko (braille) ena vosa vakaJamani, vaKorea, kei na vosa vakaUkraine. Sa tiko ena jw.org na kena e rogoci, e wiliki tale ga. Na braille vaKorea kei na vakaUkraine e rawa ni vakayagataki kina na misini lailai e rogoci (notetaker). Na braille vakaJamani e vakarogoya na ka e volai tiko ena screen.
Vakayagataka tiko na tacida tagane qo mai Korea na notetaker
Era dau vakayagataka na mataboko na katokatoni kei na notetaker, ia levu vei ira era taleitaka mera vakayagataka na ivola ni braille. Sa tabaki oti qai vakau vei ira na dautukutuku na imatai ni itabataba ni iVolatabu ni braille vakaJamani. Ena qai vakau vei ira na dautukutuku ena vica na vula mai qo na iVolatabu ni braille vaKorea. Ena vuku ni ivalu e yaco tiko mai Ukraine, e se sega ni vakau na iVolatabu ni braille vakaUkraine.
Me rawa ni caka na New World Translation ni braille, ena vinakati me lavetaki na matanivola kei na kena idusidusi. E biu tale ga na mape kei na iyaloyalo me rawa nira kila na mataboko.
E kaya e dua na tacida yalewa mataboko mai Jamani: “E dredre meu guilecava na ka au wilika ena braille, e vinaka cake sara mai na noqu rogoca. E uqeti au meu lomani Jiova vakalevu, qai nuitaki koya.”
iCake ena imawi: Qo na misini e dau tabaka na digo ena braille. Loma: Biuta tiko na tacida yalewa qo na reveni ena itabataba ni braille, oti ena qai biuti ira vata. iMatau: Vakarautaki na braille me veisoliyaki vei ira na tacida
E tabaki kece na iVolatabu ni braille mai Wallkill, Niu Yoka mai Merika, ni vakayagataki na kena misini (braille embosser). Na misini qori ena tabaka na digo ena kena pepa, sa na qai tuvani ira vata kece me dua kina na ivola, oti sa qai vakau ina valenivolavola ni tabana me veisoliyaki vei ira na dautukutuku. Na dua taucoko mada ga na New World Translation ni braille, e rawa ni tiko kina e sivia ni 30 na itabataba qai rauta ni rua na mita na levu ni vanua me biu kina.
E kaya e dua vei ratou na lavetaka na New World Translation of the Holy Scriptures ena vosa vaKorea: “Dua na ka neitou vakavinavinakataki Jiova, ni keitou vakasamataka na sala ena yaga kina vei ira na tacida mataboko na iVolatabu qo.”
Eda nuidei ni New World Translation qori, ena yaga vei ira na tacida mataboko ni vakarautaka o Jiova vei ira “na veika vinaka.”—Same 107:9.
Rawa ni o Wilika Tale ga
TARO E TAROGI WASOMA
E Tiko Nomuni iVolatabu na iVakadinadina i Jiova?
E rawa ni o vakavinakataka na ivakarau ni nomu vuli ni o vakayagataka e levu na vakadewa ni iVolatabu. Qo e tolu na tikina mo kila tiko me baleta na iVolatabu na Vakadewa ni Vuravura Vou.
E VAKAYAGATAKI VAKACAVA NA NODA CAU?
Tabaki na iVola Mareqeti Duadua
Levu na ka e okati ena kena vakadewataki, tabaki, qai dabani na New World Translation.
E VAKAYAGATAKI VAKACAVA NA NODA CAU?
Veisautaka na Bula na Matanivola Digo
Keimami sega ni vakarautaka ga na ivola vakaivolatabu ni mataboko, ia keimami vakavulici ira tale ga eso mera wilika na nodra matanivola na mataboko.