Ena ika25 ni Epereli 2020, e kacivaka o Brother Mark Sanderson, e lewe ni iLawalawa Dauvakatulewa ena vidio na kena sevutaki na New World Translation of the Holy Scriptures ena vosa vakaCrotia kei na vakaSerbia. E volai na iVolatabu vakaSerbia ena matanivola vakaRoma kei na vakaCyrillic.

Era sega ni soqoni vata na ivavakoso e Bosnia kei Herzegovina, Croatia, Montenegro, kei Serbia ena gauna e sevutaki kina na iVolatabu, ena vuku ni vakatatabu ni matanitu me baleta na tete ni matedewa na COVID-19. Ia era sarava ga ena vidio na soqo qori, era tiko kina e rauta ni 12,705.

E kaya e dua na tacida tagane e sarava na porokaramu qori, ni iVolatabu qo e vaka e dua na “iyau talei, ni vosa sara tiko ga vua o Jiova.” E kaya tale ga e dua na qase ni ivavakoso: “Na levu ga ni noqu wilika na iVolatabu qo ena noqu vosa ni sucu, au vakila dina ni lomani au o Jiova, e karoni au tale ga. Niu dua na ivakatawa ena ivavakoso, au na vakamacalataka tale ga vakavinaka vei ira na mataveitacini ni lomani ira vakalevu o Jiova, e mareqeti ira tale ga.”

E tekivu vakadewataki na iVolatabu qori ena icavacava ni 1996. Ni oti e rua veimama na yabaki, e sevutaki ena Julai 1999 na New World Translation of the Christian Greek Scriptures ena vosa vaCroatia kei na vosa vakaSerbia. Ni oti e vitu na yabaki ena 2006, e sevutaki na iVolatabu taucoko na New World Translation of the Holy Scriptures ena rua na vosa qori.

E matata qai vakadewataki donu na rua na iVolatabu qori, eda nuidei gona nira na vakadinadinataka na dauwiliwili ni “bula na Vosa ni Kalou.”—Iperiu 4:12.