Ena ika15 ni Feperueri 2020, e sevutaka o Brother Geoffrey Jackson, e lewe ni iLawalawa Dauvakatulewa na New World Translation of the Holy Scriptures ena vosa vagalu ni Merika (ASL). Qo na imatai ni iVolatabu ena vosa vagalu me vakadewataki taucoko e vuravura. Qori na itukutuku vakairogorogo me kacivaki ena vakatatabutaki ni Valenivolavola ni Vakadewa tu yawa ni vosa vagalu ni Merika (RTO) e Fort Lauderdale, Florida, e Merika. E vakayacori na soqo ena nodra Vale ni Soqoni Lelevu na iVakadinadina i Jiova e West Palm Beach, e Florida.

Era tiko kina e sivia ni 2,500, era sema tale ga yani ena nodra Vale ni Soqoni e le 15,635 e Belize, Kenada, Dominican Republic, Haiti, Trinidad kei Tobago, kei Merika. Na kedra iwiliwili kece e sivia na 18,000.

Ni oti na ivunau ni vakatatabu, e sevutaka sara o Brother Jackson na iVolatabu ni vosa vagalu ni Merika. Ni voleka ni oti na nona ivunau, e kaya: “Keitou via kaya vei kemuni e dua na ka—e dua na ka vakasakiti. Na sevutaki ni vola i Jope, sa mai vakacavari tale ga kina na vakadewataki ni New World Translation taucoko  . . . Ena gauna mada ga qo, keitou kila ni o keda na iVakadinadina i Jiova e imatai ni isoqosoqo, se ilawalawa me sevutaka na iVolatabu taucoko ni vosa vagalu ni Merika. Kena ibalebale, qo na imatai ni iVolatabu ena itukutuku ni kawatamata me sevutaki ena vosa vagalu e vuravura taucoko.”

E taura e 15 na yabaki me vakadewataki kina na iVolatabu taucoko, wili kina na iotioti ni ivola me vakadewataki na ivola i Jope. E vakadonuya na iLawalawa Dauvakatulewa ena 2004, me dua na New World Translation ni vosa vagalu ni Merika. Oti e rua na yabaki, e sevutaki na ivola i Maciu, na vo ni ivola ena iVolatabu vaKirisi era qai sevutaki yadudua me yacova na 2010. E rauta ni 10 na yabaki na kena vakadewataki tiko na iVolatabu vakaIperiu.

Dua na ka na kena yaga vei ira na vosa vagalu na kena sevutaki yadudua tiko na New World Translation ena vosa vagalu ni Merika. E kaya o Isias Eaton, e dua na dautukutuku e tiko ena soqo qori: “Dua na ka na noqu tagi ena imatai ni gauna au raica kina na New World Translation. E sega ni tara na lomaqu noqu wilika na iVolatabu ena vosa vakavalagi, ia na gauna au raica kina na iVolatabu ena vosa vagalu, au sorova sara ga na tagi.”

E yaga vakalevu na vakadewa ni iVolatabu qori ena cakacaka vakaitalatala vei ira e levu na dautukutuku ena ivavakoso vosa vagalu. O David Gonzalez e dua na dauvakadewa ena (RTO) ni vosa vagalu ni Merika, e kaya: “E vukei au meu kila vinaka na ka dina, meu doudou qai yaloqaqa tale ga ena cakacaka vakaitalatala. Ni se bera ni sevutaki na ivakadewa ni iVolatabu qo, au dau lomaleqa qai nuitaka me kua ni tarogi au o itaukeinivale ena dua na taro dredre. Ia qo au sa tu vakarau, au nuidei tale ga ni sa tiko na New World Translation taucoko ni vosa vagalu ni Merika!”

O Nicholas Ahladis e dua e dauveivuke ena Tabana ni Vakadewa ena itikotiko liu e Warwick, Niu Yoka, e kaya: “Na sasaga ni kena vakadewataki na iVolatabu qo e ivakaraitaki vei ira na vo ni vosa vagalu. Eso na ivola ena iVolatabu sa vakadewataki ena 17 na vosa vagalu, levu tale era sa vakadewataki tiko.”

Na iVolatabu qo ena vukei ira e levu mera volekati Jiova, ni na uqeta na lomadra na ka era sarava sara ga ena nodra vosa mai na iVolatabu.—Cakacaka 2:6.