Ena ika2 ni Julai 2023, e sevutaki na ivola The Bible—The Good News According to Matthew ena rua na vosa vaKurd. E caka qori ena rua na soqo. Kena imatai, e sevutaki na ivola i Maciu ena vosa vaKurd Kurmanji e Jamani. E sevutaki na ikarua ni ivola ena vosa vaKurd Kurmanji (Caucasus) e Georgia. Era tiko e rauta na le 750 ena rua na soqo qori.

E sevutaka na ivola i Maciu ena vosa vaKurd Kurmanji o Brother Dirk Ciupek, e lewe ni Komiti ni Tabana e Urope e Loma. E caka na kena soqo ena valenivolavola ni tabana e Urope e Loma ena tauni o Selters e Jamani. E veisoliyaki tale ga na kena ilavelave tabaki. E sa rawa tale ga ni download ena iyaya vakalivaliva.

E sevutaka o Brother Levani Kopaliani, e lewe ni Komiti ni Tabana e Georgia na ivola i Maciu ena vosa vaKurdKurmanji (Caucasus). E caka na kena soqo ena siti o Tbilisi, ra qai sema yani kina na tacida mai Aparan, Armavir, kei Yerevan mai Armenia. E veisoliyaki tale ga na kena ilavelave tabaki. E sa rawa tale ga ni download ena iyaya vakalivaliva.

Rau via tautauvata na vosa vaKurd Kurmanji kei na vosa vaKurd Kurmanji (Caucasus), ia e duidui na ituvatuva ni vosa se yatuvosa. E tautauvata eso na vosa e vakayagataki kina, ia e duidui na kena ibalebale. Era cakacaka vata gona na daunivakadewa ena gauna e vakarautaki tiko kina na ivola ena rua na vosa qori. E vakamacalataka e dua na daunivakadewa na yaga ni ivola vou qo. E kaya: “Era via kila tu na matatamata na Kurd na ka dina, na ivola vou qo ena vaka ga era gunuva e dua na bilo wai savasava.”

Eda duavata kei ira na tacida era vosa vaKurd Kurmanji- kei na vosa vaKurd Kurmanji (Caucasus), ena noda vakavinavinakataki Jiova ni vakarautaka na sala vei ira e levu mera vakavinakataka na nodra bula vakayalo!—Maciu 5:3.