Ena ika26 ni Okotova 2022, e le 106 na tacida tagane, kei na 4 na tacida yalewa e Rusia kei Crimea, era vesu tiko ena vuku ni nodra vakabauta. O Brother Dmitriy Dolzhikov e yabaki 44, e ika100 ni tacida e vesu tiko ena gauna qo. A vesu ena ika8 ni Seviteba 2022, ni tiko ena soqoni qai wasea vei ira eso tale na nona vakabauta. E beitaki kina ni vakaitavi tiko ena cakacaka ni soqosoqo e vakavuna na tikoyavavala. Tekivu mai na vakatatabu ena 2017, era sa vesu e voleka ni le 350 na tacida.

Era vesuki Dmitriy na ovisa ni oti nodra vaqaqara e nona vale ena yasayasa o Chelyabinsk. Oti e rua na siga, e lai vesu vakawawa ena yasayasa o Novosibirsk, e rauta ni 1,500 na kilomita na kena yawa mai nona vale.

Ratou vesu vata kei Dmitriy e le 12 tale. E sega ni vakadonui me sikovi koya na watina o Marina, e rawa ga ni rau veivolavolai.

E kaya o Marina: “Gauna e vesu kina au sega sara ga ni moce rawa, qai levu na bogi au yadra tu ga. Era dau sureti au na mataveitacini ena ivavakoso meu lai tiko vata kei ira. Qori e vukei au sara ga vakalevu.”

E kaya o Marina ni lomavakacegu tu ga o Dmitriy, qai donu tiko ga nona rai. E tomana: “E tokoni koya tu ga o Jiova.”

Era beitaki na tacida ena lawa na Russian Federation Criminal Code me baleta na cakacaka e vakavuna na tikoyavavala. E okati tale ga kina o Anna Safronova e yabaki 57, e totogitaki me vesu ono na yabaki. Qori e dua na itotogi warumisa me tau vua e dua na tacida yalewa.

Nona vesu o Dmitriy e dua na ka vakaloloma duadua me cakava o Rusia vei ira na tacida. Era rarawataka vakalevu na isoqosoqo e veiyasa i vuravura na ka e cakava o Rusia, ia sa sivia qo e lima na yabaki nona cakava tiko qori. Gauna e vakatabuya kina ena 2017 na Mataveilewai Cecere e Rusia na noda cakacaka, era kaya na vakailesilesi e Rusia ni sa sega tale ni vakadonui meda dua na isoqosoqo vakalawa. Era kaya tale ga nira na sega ni vakaleqa noda sokalou, ia ra qai cakava na kena veibasai. Me yacova mai qo, sa 308 na kisi ni veilewai, ra qai veilewaitaki e voleka ni le 700 na tacida. E caka tale ga na vaqaqara ena 1,851 na nodra vale.

Meda masulaki Dmitriy kei ira kece na tacida era vakacacani ena vuku ni nodra vakabauta. Eda kila ni o Jiova ena vakaukauataki ira tiko me rawa nira vosota.—Maciu 24:13.