Ena Janueri 2023, sa qai rawa nida soqo vata tale ena soqo ni tabacakacaka ni oti e tolu na yabaki na vakatatabu ni COVID-19. Ena gauna vata qori sa rawa tale ga ni caka na vuli vakalou ena levu na vanua. E laurai ni vakalougatataka dina o Jiova na soqo ni tabacakacaka kei na vuli vakalou.

Kena ivakaraitaki, era veivuke e rauta ni le 200 na dautukutuku e Villahermosa, Tabasco State, e Mexico, mera samaka na Vale ni Soqoni Lelevu e vakayacori kina na soqo ni tabacakacaka. Eso era gole me rauta ni ono na aua me rawa nira lai sasamaki. E kaya e dua na tacida yalewa: “Sa oti qo e dua na gauna balavu, da qai raici ira tale na tacida mera soqoni vata. Eda marau sara ga nida bau rawa ni veivuke.”

E kaya e dua na tacida yalewa, a tiko ena soqo ni tabacakacaka mai Crownsville, e Maryland mai Merika: “Dua na ka na levu ni noqu marau. Au sa tekivu luluvu ena gauna au yaco mai kina. Ni sebera ni tekivu na soqo, sa suasua kece na noqu tavoi. Au sega sara ga ni via calata na soqo ni tabacakacaka qo.”

Era marau tale ga na tacida ena levu na valenivolavola ni tabana nira sa rawa ni sota ena vuli ni Koronivuli ni Cakacaka Vakaitalatala ni Matanitu kei nodra vuli na iVakatawa ni Tabacakacaka kei na Watidra. E kaya o Brother Giovanny Cabezas, e dauveivakavulici ena koronivuli vakalou ena siti o Palm Coast, e Florida mai Merika: “Au marau vakalevu ni sa rawa tale nida sota ena gauna e caka kina na vuli vakalou. Qo e dua na vanua totoka ni vuli, nida maliwai ira na qasenivuli, gonevuli kei ira na tacida era bolecakacaka. Era vakaliuca kece na vakayacori ni loma i Jiova.”

O Sister Satoko Nakata, a tiko kei watina ena nodra vuli na iVakatawa ni Tabacakacaka kei na Watidra ena Janueri 2023. E kaya: “Ena gauna ni matedewa, eda marautaka ni tomani tiko ga na soqoni kei na vuli ni painia ena Zoom. Ia e sega ni rawa nida veitalanoa vinaka, meda veidredrevaki se meda lagasere vata. Na neirau mai tiko ena vuli qo, e iloloma talei mai vei Jiova. Nida dua na gonevuli, eda na veitalanoa, veidredrevaki, lagasere ia so na gauna eda na veitagicaki. Au vakavinavinakataki Jiova kei na iLawalawa Dauvakatulewa.”

Eda nuidei ni na marautaka o Jiova ni raici ira nona dauveiqaravi nira soqoni vata mera sokalou qai tiko ena vuli vakalou. Eda duavata kei na ka e tukuna qo o Tui Tevita: “Au na qai vakavinavinaka vei kemuni ena ivavakoso levu, au na vakacaucautaki kemuni ena kedra maliwa na isoqosoqo tamata.”—Same 35:18.