Ena imatai ni Seviteba 2022, keimami marau na iVakadinadina i Jiova e veiyasa i vuravura me keimami cakacaka vakavunau tale e veivale. Keimami vakaitavi tale ga ena vunau lavotaki, ya na nodra sureti na lewenivanua mera vuli iVolatabu. Eso vei keimami sa matau ena cakacaka vakavunau, keimami marautaka tale ga na iwalewale cava ga me rawa ni keimami vunau kina. Ia eso se qai imatai ni gauna mera vunau kina e veivale. Qo eso na irogo e veiyasa i vuravura e vakaraitaka na marau e vakilai ena itekitekivu ni yabaki vakacakacaka ni 2023.

Ena ika2 ni Seviteba 2022, rau vunau tiko e rua na tacida yalewa o Nicole kei Tina ena veivale e Petershagen e North Rhine-Westphalia. Ia rau sega ni bau kunea e dua me tiko e vale. Ni rau biubiu mai ena dua na vale, rau rogoca sara e dua na marama e kacivi rau tiko. E kaya ni sega ni rawa ni gole mai tuba ena gauna rau tukituki tiko kina. E mani kerea me rau lesu tale me ratou veivosakitaka na iVolatabu. Ni rau curu i nona vale, rau raica sara ena dela ni teveli e dua na ilavelave ni New World Translation of the Holy Scriptures. E kaya na marama qori ni a soli vua ena nona tiko mai Itali ena tolu na yabaki yani i liu. Ia e sega ni sotavi ira na tacida ena nona toki mai Jamani ena gauna ni matedewa. Ratou veisoli naba ni talevoni sara, rau sureti koya tale ga ena soqoni. Oti e rua na siga, e gole ena soqoni kei rau na luvena. E tuvanaki sara me vuli iVolatabu.

Erau painia lavotaki tiko ena yalava vosa vakaMamo o Manuel kei Karol Gastelum. Rau sotava sara e dua na marama yalovinaka, e mani sureti rau e nona vale. E sega ni kila na marama qori na yaca ni Kalou. Ratou vulica vata sara na lesoni 04 ena ivola Marau me Tawamudu, e kena ulutaga “O Cei na Kalou?” E kurabui sara ga ni wilika ena nona iVolatabu ena Aisea 42:8 ni yaca ni Kalou o Jiova.

E tagi na marama qori qai kaya ni sega ni vinakati me tu ga vua na iVolatabu, ia me vulica qai muria tale ga na kena ivakavuvuli. E marautaka na ka e vulica ena lesoni qori. E kaya me na wasea tale ga vei watina. Rau tuvanaka tale ga o Manuel kei Karol na gauna me tomani tale kina nona vuli.

Erau vunau tiko o Brother kei Sister Nukamori e Yokohama, rau donuya sara e dua na vale e tiko kina na intercom. Rau mani vakayagataka qai sauma mai e dua na marama. Rau vakamacalataka sara na veiwatini ni rau iVakadinadina i Jiova. E mani kerei rau na marama qori me rau wawa e matanikatuba. Ni yaco yani e kaya, “Au sa waraki kemuni tu na iVakadinadina i Jiova moni mai sikovi au.”

E kaya ni a vuli iVolatabu tiko kei na dua na tacida mai Nagasaki. Gauna ni matedewa e toki i Yokohama, ia e tomani tiko ga nona vuli ena zoom. Ena itekitekivu ni macawa ya, e kaya vua nona qasenivuli: “Ena caka ena Seviteba e dua na vunau lavotaki. Ke sikovi iko yani e dua na iVakadinadina i Jiova, mo kerea vua mo drau vuli e nomu vale.” E kurabui na marama qori nira sikovi koya totolo yani na tacida. E kaya ni via tiko ena soqoni, qai taleitaka me tomana nona vuli.

Dua na veiwatini rau sureta e dua na marama me vuli iVolatabu. E kaya ni a vulica tu na iVolatabu, sa gole tale ga ena soqoni. Ia e sega ni qai veitaratara tale kei ira na tacida, e maduataka tale ga ni sa sega ni muria na ivakavuvuli vakaivolatabu. E tagi ni vakamacalataka oti vei rau na veiwatini na kena ituvaki. Rau wilika sara vua na Same 10:1,7 qai vakamacalataka ni sega ni guilecavi koya o Jiova. Rau vakavinavinakataka tale ga ni vinakata me muria na ivakatagedegede i Jiova. E vakadonuya me vulica tale na iVolatabu, me vuli tale ga o luvena tagane e yabaki 16.

Ena siga tarava, rau sa waraki rau tu na veiwatini. Oti nodratou vulica na lesoni 01 ni brochure Marau me Tawamudu!, rau sureti rau sara ena soqoni ena muanimacawa. Rau mani gole ena soqoni. Rau sa vinakata me rau tomana nodrau vuli, rau tiko tale ga ena soqoni.

Ena imatai ni macawa ni cakacaka vakavunau e veivale, e masulaka o Ramon me vunautaka vua e dua na itukutuku vinaka. Ni tukituki ena imatai ni nona vale, e dolava ga mai vakalailai e dua na marama na katuba qai iro mai kina. E kidavaki koya vakalekaleka o Ramon. Ni bera ni vakamacala, e kaya na marama qori, “Au waraki kemuni sara tiko ga. Au dau masulaka me dua vei kemuni me mai tukituki e noqu katuba.”

E kaya tale ga ni sa sotavi ira oti na tacida, sa gole tale ga ena soqoni. Ia e sega ni sotavi ira tale ena gauna e toki kina. E qai vakamacalataka o Ramon ni a tarovi tu na cakacaka vakavunau e veivale ena vuku ni matedewa. E wilika vua na Same 37:29, qai vakamacalataka na ituvatuva ni vuli iVolatabu. E vakadonuya sara na marama qori me vulica na iVolatabu. E tuvanaka o Ramon me vuli kei na dua na tacida yalewa.

Oti na ka e yaco qori, e kaya o Ramon: “Au kila ni dusimaki keda tiko o Jiova, kei ira na agilosi vei ira na via rogoca na ka dina.”

E vunau tiko o Katelyn Thompson ena dua na vale e Kentucky. E raica sara ni volai tu eso tikinivolatabu ena katonimeli. E volai tale tu ga ena lomanibai na ivakatakilakila, “E Lomani Iko o Jisu.” E tukituki sara o Katelyn ena matanikatuba, qai dolava mai e dua na marama. E kidavaki koya o Katelyn, qai vakamacalataka ni tarovi tu noda vunau e veivale ena vuku ni COVID-19. E kaya tale ga nida qiri qai vola ivola meda veivakayaloqaqataki qai vakacegui ira eso tale. E taroga sara o Katelyn se ratou vakacava tiko vakavuvale. E tukuna sara na marama qori ni mate o tamana ena gauna ni matedewa. E kaya, “Au dau ciqoma e levu nomuni ivola, au vakila sara ga ni vakacegui au na Kalou ena gauna au vinakata kina.” E vakayaloqaqataki koya o Katelyn, qai vakamacalataka vua na lesoni 02 ni brochure Marau me Tawamudu! Rau wilika vata na tikinivolatabu ena lesoni qori, qai veitalanoataka na inuinui ni veivakaturi ena gauna se bera mai. E tagi na marama qori, qai kaya ni sa oti qo e dua na yabaki na mate nei tamana. E solia sara vei Katelyn nona naba ni talevoni, qai vakadonuya me sikovi tale. Oti e text sara vei Katelyn qai kaya: “Vinaka vakalevu, au vakayaloqaqataki dina nikua!”

Io, eda vakadeitaka ni vakalougatataka o Jiova noda vunau tale e veivale, kei na noda vakaitavi ena vunau lavotaki. Eda vakanamata tu ni na vuavuaivinaka na ka ena rawati!—Joni 4:35.