Ena imatai ni June 2023, e vakatarai me caka na sarasara ena levu na Peceli e veiyasa i vuravura. E tolu na yabaki na kena sega ni caka tu qori ena vuku ni matedewa na COVID-19. E dua dina na gauna marautaki vei ira na lewe i Peceli e vuravura raraba, wili kina o ira na le vica vata na udolu na sarasara yani.

Nira yaco yani na vulagi, era kidavaki vei ira na lewe i Peceli ena sere, era matadredredre ra qai veimokomoko. Ena gauna ni matedewa, e veiqaravi tiko o Brother Ellis Bott ena itikotiko liu e Warwick, e Niu Yoka . E kaya: “Dua na gauna marautaki nida raici ira na lewe i Peceli nira duri tu e tautuba mera kidavaki ira na vulagi! Niu raica nodra veitagicaki au kila na levu ni nodra mareqeti Peceli.” E dau veiqaravi vagauna e Peceli o Alexis Alexander. E marau ni rawa tale ga ni kidavaki ira na vulagi era lai sarasara yani e Peceli. E kaya: “Au na sega ni guilecava rawa na noqu raica na levu ni nodra lomani Jiova kei na nona vale.”

E rai vakanamata o Mi-yeon Jo me kauti luvena tagane yabaki walu o Yoon, me lai sarasara ena valenivolavola ni tabana e Sauca Korea. E sega ni moce vinaka o Yoon nona waraka tiko na siga tarava me lai sarasara e Peceli. E kaya o Mi-yeon: “Ni keitou yadra ena mataka lailai, keitou vakatagitaka sara na sere me baleta nodrau gade i Peceli o Kelepi kei Sofia. Keitou rogoca tiko ga na sere qori ni keitou vodo tiko ena motoka.” E marautaka vakalevu o Yoon nona gade ina valenivolavola ni tabana, e kaya: “E vaka sara ga na parataisi o Peceli, sa vo ga me biu kina na manumanu.”

O Noah Johnsen, e dua na cauravou mai Alberta Kenada, e tauvi koya na paralase. E dau vinakata me gade ina Peceli e Niu Yoka, Merika. E sega ni rawa ni vodo waqavuka ena vuku ni tauvimate. Rau mani draivataki koya nona itubutubu me rauta na 4,100 na kilomita me yaco ina valenivolavola ni tabana. E kaya o Noah me baleta nona sarasara e Peceli: “Au rawa ni vakamacalataka ga ena dua na vosa, ya na loloma. Au vakila na loloma i Jiova kei ira na mataveitacini.”

Rau marautaka tale ga na nodrau lai sarasara ena Peceli e Kazakhstan, o Fyodor Zhitnikov, e yabaki 76, kei na watina o Yulita. E vakaraitaki tu e Peceli na kedra ivolatukutuku na tacida era vosota na veivakacacani me vica vata na yabaki. E tarai Fyodor sara ga ni veiqaravi kei ira e levu na tacida qori. E vakamacalataka na nona vakavinavinakataka na kena vakarautaki na vanua ni sarasara qori. E kaya: “Era raica na tacida me maroroi na itukutuku makawa qo me baleti ira na mataveitacini, sa na qai wacava sara o Jiova nona mareqeta na veika eda cakava ena vukuna.”

Eda marau ni sa rawa tale nira sarasara na vulagi ena Peceli e veiyasa i vuravura. Eda rai vakanamata meda kidavaki ira e vica vata na udolu ena veigauna se bera mai!—Same 122:1.

Vakaraitaki tiko qo na kedra itaba na tacida era lai sarasara e Peceli.