Me vaka e sa vakarogoi oti, na 2022 e sa ika25 ni yabaki ni noda vakarautaka na iVakadinadina i Jiova na noda website. Ia e vakavoutaki ena tini na yabaki sa oti qai sevutaki ena ika27 ni Okosita 2012. Ena vakamacalataki ena tolu na ulutaga na sala e yaga kina na jw.org vei ira e vica vata na milioni.

Vidio: Ena soqo ni veiwasewase ni 2012, e sevutaki ena DVD e rua na vidio e kena ulutaga Mo iTokani i Jiova. Ia ni toso na gauna, e sa sega ni vakayagataki vakalevu na DVD qai saulevu na kena vakarautaki. Ni vakavoutaki na noda website ena 2012, e sa vakayagataki sara me veisoliyaki kina na vidio. Koya gona, ena Janueri 2013, e biu ena noda website na vidio vou ena iwasewase Mo iTokani i Jiova, e kena ulutaga Masu e Veigauna. Me yaco mai qo, sa vakarautaki e sivia e 40 na vidio qori.

E sevutaki tale ga ena website ena 2013, na vidio Vuna mo Vulica Kina na iVolatabu. E yaga vakalevu qori ena noda cakacaka vakaitalatala qai okati ena iVukevuke ni Veivakavulici. Me tekivu mai na gauna qori, e biu ena noda website na vidio e vakayagataki vakalevu ena cakacaka vakavunau. Kena ivakaraitaki, ena Okosita 2014 e veisoliyaki na tikidua me baleta na jw.org ena dua na vunau lavotaki. Ena gauna qori, e download se saravi e rauta ni 15 na milioni na vidio.

E kaya e dua na tacida tagane e veivuke ena kena vakarautaki na jw.org: “E vaqaqacotaka sara ga na noqu vakabauta niu raica na sala e vakarautaki keda kina o Jiova ena veigauna se bera mai. Keitou sega ni kila ena gauna ya, ni na lai yaga vakalevu na website ena kena veisoliyaki na vidio.” Kena ivakaraitaki, e vakarautaki na JW Broadcasting ena Okotova 2014, qai download ena vula qori e sivia ni 37 na milioni na vidio. Ni tekivu na COVID-19 ena 2020, e laurai ni download se saravi e levu tale na vidio ena jw.org. Me yacova na 2022, e download ena veivula e sivia ni 260 na milioni na vidio.

iVola: Ena vica na yabaki sa oti, levu era sa sega ni wilika na ivola e tabaki ia era taleitaka mera wilika ena internet se na porokaramu ena talevoni. Ni vakavoutaki na noda website ena 2012, levu era wilika na noda mekesini ena jw.org ni bera nira ciqoma na kena e tabaki. Qori e vakarawarawataka na kena vakarautaki na JW Library ena 2013. E yaga ruarua qori meda wilika se vulica na ivola vakaivolatabu.

Ena veigauna sa oti, na ivola e dau sevutaki ena soqo ni veiwasewase ena qai biu ena website ni oti e vica na vula. Ia ena soqo ni veiwasewase ena 2015, era marautaka na tiko kina nira rogoca ni sa rawa ni download na vidio kei na ivola e sevutaki ena gauna vata ga ya. Qori e okati kina na ivola Jisu—Na Sala, na Dina, na Bula kei na ivola Mo Lesu Vei Jiova. E rawa tale ga ni download na vidio Na Cava na Dodomo Dina? Ena Me 2016, e sevutaka ena JW Broadcasting o Brother Anthony Morris, e lewe ni iLawalawa Dauvakatulewa na brochure iSau ni 10 na Taro Era Taroga na iTabagone. E kaya tale ga ni sa rawa ni download. Qori e imatai ni gauna me sevutaki kina e dua na ivola ena dua ga na gauna vei ira na tacida e veiyasai vuravura.

E sa dua na gauna balavu na nona vakayagataka tiko mai na isoqosoqo i Jiova na iyaya vakalivaliva me kacivaki kina na itukutuku vinaka. Eda marau ni yaga vakalevu na jw.org me vakarautaki kina na “kakana ena kena gauna donu.”—Maciu 24:45.

• Na vidio e download ena veivula

• O ira na rai ina website ena veisiga ena veivula

• Sevutaki ena Janueri 2013 na vidio Masu e Veigauna

• Sevutaki ena Okotova 2013 na JW Library

• Vunau lavotaki ena Okosita 2014 e veiyasai vuravura me baleta na jw.org

• Sevutaki ena Okotova 2014 na JW Broadcasting

• Ena Me 2015, e rawa ni download na vidio kei na ivola e sevutaki ena soqo ni veiwasewase

• Ena Me 2016, e sevutaki e veiyasai vuravura na brochure brochure iSau ni 10 na Taro Era Taroga na iTabagone