E volai ena imatai ni wasewase ni ulutaga qo, na kena vakarautaki qai veisoliyaki na vidio kei na noda ivola ena jw.org. Ena vakamacalataki ena ikarua ni wasewase na sala e yaga kina na jw.org, mera rogoca kina mataveitacini na veika era sotava tiko na tacida.

iRogo ena Noda Website: E dau vakarautaki kina na itukutuku nuitaki me baleta na veika era sotava tiko na tacida. E okati kina na itukutuku vovou me baleta na leqa tubukoso, na vakacoko, nodra veitusaqati na veimatanitu, nodra vesu vakatawadodonu na tacida kei na so tale na ka bibi era sotava. Kena ivakaraitaki, ena ika21 ni Maji 2017, e vakarogoi vei ira na mataveitacini kece ni sa vakarau vakatabui na nodra sokalou na tacida e Rusia. Eda sureti tale ga kina meda volavola vei ira na vakailesilesi vakamatanitu e Rusia.

iTukutuku Butakatakata: E tekivu vakarautaki qo ena jw.org ena Julai 2017. E leleka ga na itukutuku qo ra qai kila na mataveitacini na itukutuku butakatakata. Kena ivakaraitaki, e dau vakarogoi na gauna era sereki kina na tacida era vesu tu ena vuku ni nodra vakabauta. E caka qori ena ika31 ni Tiseba 2020, ena gauna e sereki kina o Feliks Makhammadiyev ena valeniveivesu e Rusia, rau qai sota tale kei na watina o Yevgeniya. Ena gauna ni matedewa, e vakayagataki na iTukutuku Butakatakata me kilai kina na kena vakarautaki na porokaramu ni soqo ni veiwasewase kei na veika e vakatulewataka na iLawalawa Dauvakatulewa. Kena ivakaraitaki, e vakarogoi nida sa na soqoni tale ena Vale ni Soqoni, meda vakaitavi tale ga ena vunau e matanalevu. E dau vakarogoi e levu na itukutuku ni oti ga e vica na aua na kena yaco eso na ituvaki vei ira na tacida. Kena ivakaraitaki, ena June 2018, e totolo ga na kena kacivaki mai ni sa tauca e dua na lewa bibi na mataveilewai e Sauca Korea. E tukuni ni cala vakalawa na matanitu ni sega ni vakarautaka e dua na cakacaka me isosomi ni curu ina mataivalu.

iRogo mai na iLawalawa Dauvakatulewa: Ena ika8 ni Maji 2020, e vakarautaki na imatai ni irogo mai na iLawalawa Dauvakatulewa ena gauna ni matedewa na COVID-19. Levu era duavata kei na ka e tukuna na tacida yalewa qo: “E vaka ga e dua na itokani e vuki kauaitaki au qai taroga keu bulabula vinaka tiko. E yaga vakalevu vei au na irogo qori ena gauna ni matedewa. E dau yaco sara ga mai ena kena gauna donu.” Me yacova mai qo, e sa vakarautaki e 28 na irogo mai na iLawalawa Dauvakatulewa.

Sa qai vakilai vakalevu na nodra sega ni duavata na lewe i vuravura qai levu tale ga na veika lelevu era yaco. E dredre me kunei na itukutuku e nuitaki. Eda marau gona ni rawa ni vakarautaki na itukutuku nuitaki qai butakatakata ena jw.org. Qori e vukei keda meda ‘tiko vakacegu qai nuitaka’ na noda Kalou o Jiova.—Aisea 30:15.

• Na vidio e download e veivula

• O ira na rai ena website ena veisiga ena dua na vula

• Kacivaki ena Maji 2017 me caka na vola ivola e vuravura raraba

• Vakarautaki ena Maji 2020 na imatai ni rogo ni iLawalawa Dauvakatulewa

• Kacivaki ena Maji 2022 ni na caka tale na soqoni ena Vale ni Soqoni

• Kacivaki ena June 2022 na kena caka tale na cakacaka vakavunau e matanalevu

• Vakarautaki vakalalai na porokaramu ni soqo ni veiwasewase mai na June ina Okosita, 2022