Ena ika29 ni Maji 2021, e kaya na mataveilewai na Gagarinskiy District Court of the City of Sevastopol mai Crimea, ni cala o Brother Viktor Stashevskiy qai totogitaki me ono veimama na yabaki e valeniveivesu. Gauna vata qori sa kau sara o Viktor me lai vesu (detention center). Ena kerea me rogoci tale nona kisi.

Viktor Stashevskiy

• Sucu: 1966 (Kansk, Yasayasa o Krasnoyarsk, Rusia)

• Me baleti koya: Toki i Sevastopol, Crimea, ena 1983. Cegu mai na mataivaluiwai ena 1993. Rau vakamau kei Larisa ena 2002. E rua na luvedrau yalewa. E dau qoroya na veika matailalai me baleta na lomalagi kei na vuravura, kei na kena tuvanaki vakamatau. E vinakata kina me kila na Dauveibuli. E vakainaki nona bula ni vulica na iVolatabu. Papitaiso me dua na iVakadinadina i Jiova ena 2004

Ena ika4 ni June 2019, era vaqaqara na ovisa ni Federal Security Service (FSB) ina nodratou vale e tini na mataveitacini mai Sevastopol. Eso na gauna era cakava tiko qori me va na aua. Gauna vata qori e sega ni vakatarai mera gunu wai se vakayagataka na valenivo o ira tacida kei na nodra vuvale. Era vakarerei tale ga vei ira na ovisa, nira kaya nira na vakacaca, era na biuta tale ga eso na wainimategaga ina nodra vale na tacida mera beitaki kina.

E mani vesu sara kina o Brother Viktor Stashevskiy me dua na bogi. E beitaki ni “liutaka na isoqosoqo e vakavuna na tiko yavavala.” Ia na kena dina a veilewaitaki ga ena vuku ni nona vakabauta. Qori e beci kina na nona dodonu vakalawa.

E kaya o Viktor ni vukei koya me yaloqaqa qai vosota ena marau, na nona dau wilika wasoma na iVolatabu kei na nona dau vakasama vakatitobu. E vakayaloqaqataki koya vakalevu na ka e kaya o Tui Tevita ena Same 62:5-8. Gauna dredre kece qori, e kaya o Viktor: “Keirau sa qai veivolekati ga kei Jiova niu kila ni tokoni au, e kabiti au tu ga. Au vakadeitaka ni o Jiova e kila na ka au sotava, kei na noqu via yalodina tiko ga vei koya. Ena vakadodonutaka na ka kece ena gauna veiganiti ena vuku ni yacana.”

Eda kila ni o Jiova ena tokoni Viktor ena vakalougatataki koya tale ga, kei ratou nona vuvale, wili kina o ira na tacida era vosota tiko na veivakacacani. O Jiova ena nodra ivakaruru kei na nodra idrodro.—Same 91:2.