Ena ika30 ni June 2024, e vakacaca na cagilaba o Beryl ena ceva ni yanuyanu o Martinique e West Indies, qai rauta ni category 3 na kaukaua ni cagi. Ena imatai ni Julai, e toso cake na kena kaukaua me category 4 qai vakacaca ena so na vanua e Windward Islands me vakai Barbados, Grenada, Saint Vincent kei Grenadines. Ena siga tarava e vakacaca e Venezuela qai toka ena category 5 na kaukaua ni cagi. Oti e volekata sara yani na ceva ni baravi kei Jamaica. Ena ika5 ni Julai, e vakacaca na cagilaba kaukaua qo e Yucatán Peninsula e Mexico, vaka kina na ceva kei Merika.

Dua na ka na bi ni uca kei na kaukaua ni cagi e vakavuna na cagilaba qori. E rauta ni 270 na kilomita na kaukaua ni cagi ena dua na aua. E vakacacani na veivale, na sitoa, wa ni livaliva kei na talevoni. E vica vata na milioni e boko nodra livaliva, sega na wai kei na so tale na ka. E ripotetaki nira mate e sivia na le 30.

Martinique (West Indies)

• Sega ni dua na tacida e mate se mavoa

• Tokitaki e ono na dautukutuku

• Vakacacani e dua na vale

• Vakacacani vakalevu e dua na vale

• Vakacacani vakalailai e dua na vale

• Sega ni dua na Vale ni Soqoni e vakacacani se vakarusai

Windward Islands

• Sega ni dua na tacida e mate

• Mavoa e vitu na dautukutuku

• Tokitaki e 67 na dautukutuku

• Vakacacani vakalevu e 39 na vale

• Vakacacani vakalailai e 31 na vale

• Vakarusai e dua na Vale ni Soqoni

• Vakacacani vakalevu e dua na Vale ni Soqoni

• Vakacacani vakalailai e va na Vale ni Soqoni

Venezuela

• Sega ni dua na tacida e mate se mavoa

• Tokitaki e 30 na dautukutuku

• Vakacacani vakalevu e 12 na vale

• Vakacacani vakalailai e ciwa na vale

• Vakacacani vakalevu e dua na Vale ni Soqoni

Jamaica

• Sega ni dua na tacida e mate se mavoa

• Tokitaki e 18 na dautukutuku

• Vakacacani vakalevu e 24 na vale

• Vakacacani vakalailai e 75 na vale

• Vakacacani vakalailai e 19 na Vale ni Soqoni

Mexico

• Sega ni dua na tacida e mate se mavoa

• Tokitaki e 320 na dautukutuku ia era sa lesu tale i nodra vale

• Vakacacani vakalailai e 11 na vale

• Sega ni dua na Vale ni Soqoni e vakacacani se vakarusai

Merika

• Sega ni dua na tacida e mate

• Mavoa e ono na dautukutuku

• Tokitaki e 242 na dautukutuku

• Vakacacani e va na vale

• Vakacacani vakalevu e 33 na vale

• Vakacacani vakalailai e 471 na vale

• Sega ni dua na Vale ni Soqoni e vakacacani se vakarusai

Era veivakayaloqaqataki na ivakatawa ni tabacakacaka kei ira na qase ni vavakoso vei ira na vakaleqai. Era vakarautaka tale ga na veika era gadreva. E tuvanaki e ono na Komiti ni Vakacoko me qarava na nodra vukei na tacida.

Me noda masu ni o Jiova ena vakacegui ira na tacida ena gauna dredre qori.​—2 Korinica 1:​3, 4.