Ena ika28 ni June 2023, e vakadonui me sa tekivu na tarataravaki e Ramapo e Niu Yoka. Ratou duavata ena vakatulewa qori na vakailesilesi ni Matabose ni Tauni o Ramapo. E tiko eso tale na idusidusi me muri, ia sa rawa ni tekivu na cakacaka.

Ni caka na bose me baleta na tarataravaki, e sega ni dua na vakailesilesi se lewe ni tauni e saqata na kena tekivu na cakacaka. E kaya o Brother Keith Cady, e veiqaravi ena tabana ni tarataravaki: “E vicavata na vula na neitou vakarautaka tiko mai na peleni ni tarataravaki me soli vei ratou na vakailesilesi. Keitou saga tale ga me muri vakavinaka na lawa. Ena vakarawarawataka na kena vakadonui na tarataravaki.” Ratou vakavinavinakataka qori na vakailesilesi qai ratou vakadonuya na ka kece e okati ena cakacaka me qaravi. O Brother David Soto, e veiqaravi tale ga ena tarataravaki, e kaya, “E taura ga e dua na aua na bose ni bera ni soli na veivakadonui! E vakavinavinakataki na nodratou gugumatua kei na nodratou veitokoni na vakailesilesi ni tauni. Keitou rai vakanamata me keitou cakacaka vata tale kei ratou ena veigauna se bera mai.”

Ni caka na veivakadonui qo, ena rawa ni tekivu e levu na ka e vauca na cakacaka e Ramapo. E kaya o Brother Cady, “Ni oti na kena usani na vunikau sa musu oti, ena qai saumi na kabani mai tuba me vakarautaka na vanua ni tarataravaki. Ni caka oti qori, era na tekivu gole yani ena mua ni yabaki na tacida era bolecakacaka mera tarataravaki. Dua na ka na neitou marau ena gauna ni bose ni sa vakadonui me tekivu na cakacaka.”

Nida lewena na soqosoqo i Jiova e veiyasai vuravura, eda vakavinavinakataki koya ena vakatulewa bibi qo. Meda kerea tiko ga ena masu me vakalougatataki ira na veiqaravi ena tarataravaki qo mera ‘vakaukauataki mera cakava na cakacaka vinaka.’—Niemaia 2:18.