E vakavinavinakataka e dua na valenivolavola ni matanitu e Merika, na iwalewale ni noda tarataravaki na iVakadinadina i Jiova e Ramapo e Niu Yoka. E solia kina ina isoqosoqo na icocovi ni $1 na milioni na ilavo ni Merika. E vakavinavinakataki na noda sasaga meda taqomaka na veika bula ena noda tarataravaki. a Qo se qai imatai ni gauna me soli kina na icocovi qo ina dua na tarataravaki ena tauni o Ramapo se ena yasayasa o Rockland County.

E kaya o Keith Cady e veiqaravi ena tabana ni tarataravaki: “Ena gauna e tuvanaki tiko kina na tarataravaki e Ramapo, e sagai sara ga me kua ni vakasabusabutaki na livaliva kei na wai, me kua tale ga ni vakaleqa na veika bula. Keitou marau ni vakavinavinakataka qori na tabana ni matanitu qai vakaicovitaki keda ni se bera mada ga ni tekivu na tarataravaki. Ena vakayagataki vinaka sara ga na ilavo qori, okati kina na nodra cau na tacida.”

E dua ga na mataqali veisisivi va qo ni tarataravaki e dau vakayacori e Merika. E tekivu ena Maji 2019, era sa vakaicovitaki e 63 na tarataravaki. E volai ena website ni tabana ni matanitu qo, ni na “uqeti ira eso tale mera taqomaka na veika bula nira tarataravaki qai vakalailaitaki tale ga na kena kaburaki na cagi na carbon dioxide.”

Eda vakavinavinakataka na ka e cakava na tabana ni matanitu ni vakalagilagi kina o Jiova.—Maciu 5:16.