Ena ika25 ni Epereli 2022, e biu ena JW Library na ilavelave e vakavoutaki ni iDusidusi ni Vakadidike ni iVakadinadina i Jiova. E tu kina e levu na idusidusi mai na noda ivola vakaivolatabu, kei na veitikinivolatabu.

A sevutaki na iDusidusi ni Vakadidike ena 2013, e tu kina na veitikinivolatabu mai na noda ivola se qai tabaki ga.

Ena vica na yabaki sa oti, era biu tale ga ena JW Library eso na noda ivola sa tabaki makawa. Levu na ivola qori eda raica ga ena Watchtower LAIBRI ENA INTERNET, ia qo eda sa rawa ni raica ena JW Library. Ena laurai ena ilavelave e vakavoutaki ni iDusidusi ni Vakadidike na ivakamacala ena noda ivola makawa, e okati kina na ivakamacala ena Insight on the Scriptures. E tu ena iDusidusi ni Vakadidike ena JW Library na ivakamacala ni idusidusi yadua. O rawa gona ni wilika ke sega mada ga ni o vakayagataka na internet.

Sa biu tale ga kina na idusidusi mai na lesoni ni ivola Marau me Tawamudu! E kaya o Kari e dua na tacida yalewa: “Au dau rere niu vunau ena talevoni, ia au kila nira vinakata tu na wekada ena yalava na veivakayaloqaqataki. Eso na gauna au vakasamataka mai eso na tikinivolatabu, ia e vinakati me rawarawa ga qai veiuqeti noqu vakamacalataka me rawa ni tomani tiko ga na veivosaki. Ia qo au sa doudou qai marautaka vakalevu noqu cakacaka vakaitalatala, ni sa totolo ga noqu kunea na idusidusi kei na ivakamacala ni tikinivolatabu ena iDusidusi ni Vakadidike, okati kina na ivakamacala ena ivola Marau me Tawamudu!”

Sa vakarawarawataki na iwalewale ni kena vakarautaki na iDusidusi ni Vakadidike me rawa ni download ena levu tale na vosa. E kaya o Ivo, e veiqaravi tiko ena valenivolavola ni tabana e Chile: “Qo e imatai ni gauna me tabaki kina na iDusidusi ni Vakadidike ena vosa vakaMapudungun. E se bera vakadua niu veivuke ena tabaki ni ivola va qo, ia e rawarawa sara na kena tabaki. Era marau na mataveitacini ni sa vakarautaki na ivola qo ena neimami vosa. Era sega vakadua ni tadra ni na vakarautaki e dua na ivola va qo ena vosa era vosataka. Dua na ka nodra marau ni na yaga vakalevu ena nodra vuli vakataki ira, kei na nodra vakavakarau ena soqoni kei na ivunau.”

• Gole ena iVolatabu, tabaka na tikinivolatabu o via vakekeli kina.

• Tabaka na tikinivolatabu. Ena laurai mai na vakatakilakila ni iDusidusi ni Vakadidike. Ke sega ni o raica na kena ivakatakilakila, e kena ibalebale ni sega ni dua na kena ivakamacala ena iDusidusi ni Vakadidike.

Ena laurai e liu ena iDusidusi ni Vakekeli na noda ivola se qai tabaki ga. Ke o via raica na idusidusi ni noda ivola makawa ena volai sara toka i ra ena lisi. Sa vica vata na yabaki qo na kena vakamatatataki na noda kila me baleta eso na tikinivolatabu. Ena biu ga mai na idusidusi vou duadua ni tikinivolatabu qori.