Ena yabaki vakacakacaka ni 2020, e duatani sara na veika dredre era sotava na iVakadinadina i Jiova e veiyasa i vuravura me baleta na nodra sokalou. Ia era vakadeitaka tiko ga mera yalodina vua na Kalou ra qai duavata vakamataveitacini.

Dua na ituvaki dredre era sotava e levu, e vu mai na matedewa na COVID-19. Se qai vakadua me vakilai e vuravura taucoko e dua na ituvaki va qo.

E totolo tale ga nira veisau na iVakadinadina i Jiova ena gauna ni matedewa. Era veisautaka na iwalewale ni nodra soqoni vata, nodra dau veivakayaloqaqataki, kei na nodra vunautaka na itukutuku vinaka.

Qo eso na itukutuku ‘rogo vinaka’ ni yaco tu na ituvaki dredre qori ena yabaki vakacakacaka sa oti.—Vosa Vakaibalebale 15:30.

Ena yabaki vakacakacaka sa oti, e sevutaki taucoko se vakatikina na New World Translation of the Holy Scriptures ena 36 na vosa. Ena vuku ni vakatatabu ni matedewa na COVID-19, era sevutaki e levu na iVolatabu qori nira sema ena soqoni na tacida ena mona livaliva. Ena gauna qo, sa vakadewataki taucoko se vakatikina na New World Translation ena 193 na vosa.

Ena ika18 ni Maji 2020, e tekivu vakarautaki ena veivula ena jw.org kei na JW Library e dua na vidio, ena veivakayaloqaqataki kina e dua vei ratou na lewe ni iLawalawa Dauvakatulewa ena gauna eda sa donuya tu qo.

Ena imatai ni rogo, e kaya o Brother Stephen Lett ni vakavu nuiqawaqawa vakalevu na matedewa, ia e dusia vakamatata nida sa “bula sara tu ga qo ena icavacava ni otioti ni veisiga. Io, eda sa bula sara tu ga qo ena iotioti ni veisiga. Na icavacava ni otioti ni veisiga!”

Dina ni veilecayaki tu na ituvaki, e kaya o Brother Lett: “E sega ni dodonu meda taqaya na tamata i Jiova.”

Ena vidio kece qori, e vakaraitaki kina eso na irogo veivakayaloqaqataki mai veiyasa i vuravura. E laurai kina na yaga ni nodra muria na tacida na nodratou veidusimaki na iLawalawa Dauvakatulewa. Ena levu na vanua, era dau vakacaucautaki keda na vakailesilesi ni matanitu nida muria totolo na vakatatabu ni matedewa.

Vicasagavulu na yabaki nodra dau soqoni vata na iVakadinadina i Jiova mera vakananuma kina na iVakayakavi ni Turaga. Ia ena yabaki qo, sa vakatabui se laurai ni sa ka vakayalomatua ga me kua na soqoni vata ena levu na vanua. Ena veivanua qori, e tukuni vei ira na vuvale mera vakarautaka ga na madrai kei na waini, ra qai sarava na vunau ni iVakananumi nira qiri ena vidio.

Ena so tale na vanua, e sega ni rawa na qiri ena Internet. Qori na ka era sotava e 11 na valenivolavola ni tabana e Aferika. Era tuvanaka kina na valenivolavola ni tabana qori mera kaburaka na porokaramu ni iVakananumi ena tivi se retio. Era rogoca rawa kina e sivia ni 407,000 na tacida na porokaramu, kei na dua na iwiliwili levu ni tataleitaki.

E vakadonuya tale ga na iLawalawa Dauvakatulewa vei ira eso na valenivolavola ni tabana, mera muria na ituvatuva e caka ena iVakananumi me caka kina na soqoni. E rawa kina vei ira na tacida era sega ni rawati ira mera sarava na soqoni e veimacawa ena tivi, mera rogoca tale ga ena retio. Nikua, era sa vakayagataka tiko na ituvatuva qori e 23 na valenivolavola ni tabana, wili kina o Aferika, Urope, Noca Amerika, kei Sauca Amerika.

Era vakila e levu na tacida na dredre ni bula vakailavo ena vuku ni matedewa na COVID-19. E tuvanaki kina e sivia ni 400 na Komiti ni Vakacoko e veiyasa i vuravura mera tokoni ira kina na tacida. Ena yabaki vakacakacaka ni 2020, e vakadonuya na iLawalawa Dauvakatulewa me soli e sivia ni $18 na milioni mera tokoni kina e sivia ni 330,000 na tacida.

Qo se qai imatai ni gauna meda sema kina ena mona livaliva meda sarava kina na soqo ni veiwasewase. Sa katoni rawa tu na nodratou ivunau na lewe ni iLawalawa Dauvakatulewa kei ira na dauveivuke. E vakadewataki na ivunau qori ena sivia na 500 na vosa. Sa qai biu na vidio ni porokaramu ni soqo ni veiwasewase ena jw.org kei na JW Library mera sarava ga kina ena nodra vale na tacida kei ira na tataleitaki.

Sa tiko mada na matedewa, ia era vakacacani tale ga vakalevu na tacida ena so na vanua.

Ena veiyabaki sa sivi, e curumi vakaukaua na nodra vale na tacida e Rusia era qai vesu. Ena gauna qo, era sa vesu tiko e 42 na tacida e Rusia, e 2 mai Crimea. Tekivu mai na 2017, e lewa na Mataveilewai Cecere e Rusia me curumi vakaukaua e sivia ni 1,000 na nodra vale na tacida.

Era vesu tiko e Eritrea e 52 na iVakadinadina i Jiova, qori e iwiliwili levu duadua ni tacida era vesu tu. Tolu vei ira qori o Paulos Eyasu, Isaac Mogos, kei Negede Teklemariam. Ratou se vesu sara ena ika17 ni Seviteba 1994, ni ratou sega ni via curu ena mataivalu ena vuku ni nodratou lewaeloma. Sa sivia tale ga qo e tini na yabaki na nodra vesu tu e 26 na tacida.

Meda masulaki ira tiko ga na tacida era tu e valeniveivesu mera yaloqaqa. Eda kila nira vakaraitaka na nodra yalodina nira vosota tiko ga na ituvaki dredre kece qori.—Vakatakila 2:10.

Ena yabaki vakacakacaka sa oti, era vakaraitaka na tacida na nodra yalodina vei Jiova nira vakayagataka eso tale na iwalewale ni vunau, era qara eso tale na sala mera veivakayaloqaqataki kina, ra qai muria na veidusimaki ni iLawalawa Dauvakatulewa kei ira na iliuliu vakamatanitu.

Era vakaraitaka ena nodra qaravi Kalou nira lomani koya dina na Dauveibuli. Na nodra yalodina nikua, ena vukei ira mera vosota na ituvaki dredre ena veigauna se bera mai.—Jemesa 1:2, 3.