Era veisautaka na tacida ena levu na vanua na iwalewale ni nodra vunau kei na nodra soqoni ena vuku ni matedewa na COVID-19. Nira soqoni, era sa qiri ga ena vidio nira sa sega ni gole ena Vale ni Soqoni. Ya na vuna era sa veisautaka kina e levu na iwalewale ni nodra tokona na cakacaka vakavunau e veiyasa i vuravura, nira cau ena Internet.

E rawa nira cau ena Internet na iVakadinadina i Jiova ena sivia na 112 na vanua nira gole ena donate.pr418.com, nira vakayagataka na debit se credit kad.

Nira sa sega ni cau e levu na tacida ena Vale ni Soqoni, era sa tuvanaka rawa tu na ilavo me musu ena veivula mera cau kina ena donate.pr418.com. Qori na ka e cakava o Sister Susan Cohen, e dua na tacida yabaki 74 mai Merika. E kaya: “E rawarawa sara ga. Keu sa cakava rawa, kena ibalebale e sega ni dredre. Dua na ka noqu marau niu se rawa tiko ga ni tokona ena cau na cakacaka vakavunau e veiyasa i vuravura.”

E sega ni dau raica tu vakabibi o Brother Eduardo Paiva mai Brazil na iwalewale ni cau qori ena donate.pr418.com. E kaya: “Au sa qai liaca ni qo e dua dina na iwalewale vinaka ni cau nida sotava na ituvaki tawanamaki. Qo e dua na sala eda se vakaraitaka tiko ga kina noda loloma kei na vakavinavinaka ena iotioti ni veisiga.”

E kaya o Brother Gajus Glockentin e ovasia ena Tabana ni iLavo ena itikotiko liu ni iVakadinadina i Jiova e Warwick, Niu Yoka: “E veivakayaloqaqataki dina nodra se vinakata tiko ga na tacida mera tokona na cakacaka vakavunau. Dua dina na ka levu qori. Keitou na raica tiko ga na sala me vakayagataki kina vakavuku na nodra cau na tacida e veiyasa i vuravura me kua ni vakasabusabutaki. Eso na tacida era sa vakalailaitaka na nodra cau ena vuku ni kedra ituvaki, ia era se gu tiko ga ni tokona vakailavo na isoqosoqo i Jiova.”—2 Korinica 9:7.