Dua na ka noda qaqarauni me kua ni takavi keda na matedewa na coronavirus, ia eda se vakila ga na kena revurevu. (Dauvunau 9:11) Ka ni rarawa nira mai takali e 872 na tacida e veiyasa i vuravura ena vuku ni matedewa qori. Era tu vakarau kina na tacida mera veitokoni, ra qai veivakacegui. (1 Korinica 12:26) Ia o koya e bibi duadua, nira nuitaki Jiova. E dau dina tu ga ena ka e yalataka ena Filipai 4:7, ni dau solia na ‘vakacegu.’

E dua na tacida yalewa o Hannchen Unnützer, e vakila dina na veitokoni ni isoqosoqo i Jiova. E painia lavotaki tiko e Bolzano, ena ceva kei Itali. Ka ni rarawa ni mai takali o watina, o Brother Manfred Unnützer, ena ika28 ni Maji, 2020 ni tauvi koya na coronavirus. Sa voleka ni 58 na yabaki nona veiqaravi vakatabakidua o Brother Unnützer, e mai tokoni koya o watina ena veiqaravi me 54 na yabaki. E 25 taucoko na yabaki rau vakayagataka ena veiqaravi vakaivakatawa ni tabacakacaka. Ena siga ni nona veibulu, era sarava mai na vunau e voleka ni 1,000 na tacida mai veiyasa i vuravura.

E kaya o Sister Unnützer: “Dua na ka noqu vakavinavinakataki ira vakalevu na mataveitacini. Era tu ga e yasaqu e veigauna kece. Au vakila kina na vakacegu! Era vakayaloqaqataki au, era vakacegui au vakayago, vakayalo tale ga. Au lomani ira dina na taciqu.”

Rau vakacegui tale ga vei ira na mataveitacini e dua na veiwatini, o Maria Jose Moncada kei na watina o Darwin. Rau veiqaravi tiko ena yalava vosa vakaQuichua, ena veiulunivanua e Ecuador. Ka ni rarawa ni mai takali na nona itubutubu o Sister Moncada. Na tinana o Sister Fabiola Santana Jordan, e painia tudei qai yabaki 56. O tamana o Brother Ricardo Jordan e yabaki 60, e dauveiqaravi ni ivavakoso e Praderas,Guayaquil. Rau mate veitaravi ena loma ga ni ono na siga. E dewavi rau tale ga na ganei Sister Moncada na COVID-19, ia rau sa bula vinaka tale.

E rarawataka vakalevu o Sister Moncada ni mai takali na nona itubutubu, dua na ka nona via lako me lai tokoni ratou na nona vuvale, me veivuke tale ga ena ituvatuva ni veibulu. Ena taura e va na aua nona lako i Guayaquil. Rau masulaka qori vakaveiwatini, rau sa qai vakatulewataka me rau kua ni lako. Rau sa qai qiri ga ena vidio vei ira na wekadrau. E kaya o Sister Moncada: “Ke keirau lai sota kei ira na wekai keirau, ena rawa ni keirau tauvimate, keirau mai vakadewa tale ga.”

Sa rauta me lomaleqa qai rarawa vakalevu o Sister Moncada, ia e dei tiko ga na nodrau ituvatuva vakayalo vakaveiwatini, rau ‘sega tale ga ni cegu’ ni kerea na nona veidusimaki o Jiova ena masu. Rau vakavakarau ena iVakananumi ni rau sureti ira na vuli iVolatabu kei na nodrau wilika na tikinivolatabu me baleta na iotioti ni vica na siga i Jisu e vuravura. Rau vunau tiko ga ni rau vola ivola, kei na nodrau tiko ena soqoni vaKarisito ena qiri ena vidio. Ena bogi ni iVakananumi, ratou tomani rau mai e ciwa na wekai Sister Moncada ratou sega ni tiko ena dina.

E kaya o Sister Moncada: “Keirau vakayaloqaqataki sara ga nira tiko ena soqoni na vuli iVolatabu nira semai mai ena qiri ena vidio, dina ni sega ni rawarawa. Keirau kidacala nira sema tale ga mai na wekaqu mai vanuatani.”

E kuria o Sister Moncada: “Dua na ka keirau vakadinadinataka, ke dredre tu vakacava na ituvaki, eda na vosota ga ke da dei tiko ga ena noda ituvatuva vakayalo. Qori ga na sala ena vakalougatataki keda kina o Jiova.”

Eda duavata kei ira na tacida ena nodra lolositaki ira na wekadra era mai takali ena vuku ni matedewa na COVID-19, eda na nanumi ira tiko ga ena masu. Eda rai vakanamata ena gauna ni sa na vakaotia kina o Jiova na ka kece e vakavuna na mosi, me vaka na matedewa. Ena vakaturi ira tale ga na nona dauveiqaravi yalodina era sa takali.—1 Korinica 15:21, 22.