Na irogo ena noda website (JW News) me baleta nodra tusaqati na tacida e uqeti keda meda vosota. Na kedra itukutuku eda rawa kina ni kilai ira vinaka, e vakayaloqaqataki keda na nodra ivakamacala, eda kila tale ga na kedra ituvaki, da qai vakadeitaka nira vosota tiko ena marau. Qo e vica na ivakaraitaki sa yaga tiko kina vei ira na tacida e veiyasa i vuravura na irogo ena noda website.

Rau painia lavotaki tiko mai Potukali, o Brother Miguel Silva kei na watina o Mónica (laurai tiko i cake). Levu vei keda e veisau na keda ituvaki ena vuku ni matedewa qo. Qori sara ga na ka rau vakila na veiwatini qo. Na ituvaki va qori e rawa ni vakavu yalolailai. Ia e vakayaloqaqataki rau na irogo me baleti Brother Konstantin Bazhenov. E dau via wili iVolatabu e valeniveivesu o Konstantin, ia e vakatabui. Ia e sega ni vakayalolailaitaki koya qori, e vola kece na tikinivolatabu e nanuma qai vakayagataka me nona iVolatabu. Dua na ka bibi rau vulica kina o Miguel kei Mónica. E kaya o Miguel: “Keirau sega ni vakasamataka vakalevu na veika keirau sega ni cakava rawa ena vuku ni matedewa, keirau saga ga me keirau kauaitaka na ka keirau rawa ni cakava e vale.”

Rau mani vakavinakataka o Miguel kei Mónica na nodrau wili iVolatabu, kei na nodrau vakasama vakatitobu. E kaya o Mónica: “Keirau kila ni o Jiova ena vukei keirau me keirau nanuma na veitikinivolatabu keirau sa vulica.” E kaya o Miguel: “Gauna qo ni vakatabui tu na veilakoyaki ena vuku ni matedewa, e uqeti keirau nona ivakaraitaki o Brother Bazhenov me keirau vakayaloqaqataki ira eso tale, lagasere ena marau vei Jiova, qai vakavinakataka na neirau masu.”

O Sister Christine Mouhima Etonde, e dua na painia tudei mai Cameroon. E kaya ni sa vica vata na yabaki nona dau rere ni rogoca na irogo ni veitusaqati. Ia e veisau vakacava nona rai? Qo na ka e kaya: “E veisau vakadua na noqu rai niu wilika ena noda website na irogo me baleti ira na tacida era vosota na veitusaqati. Niu wilika na ka era cakava na tacida era duidui yabaki, na matata ni ka era masulaka, nodra matadredredre kei na nodra vakarautaki ira ena veivakacacani, qori e uqeti au meu kilai Jiova vakavinaka. Au sa qai lomani Jiova ga vakalevu, au sa sega ni rere. Au sa tu vakarau meu vakacacani tale ga. Au kila niu na marau, masuti Jiova qai vakasamataka vakatitobu na veika me baleti koya.”

Rau vakaitikotiko o Brother Iulian Nistor kei na watina o Oana mai Romania. E uqeti rau vakalevu na nona dei tiko ga ena vakabauta o Brother Anatoliy Tokarev ena vanua ni veilewai. E sega ni cudru, e veidokai qai vakadeitaka me yalodina tiko ga. Na nona ivakaraitaki e uqeti Iulian kei Oana, me rau vakasamataka na sala me rau tutaka kina nodrau vakabauta ke mani rau veilewaitaki. E kaya o Oana: “Ni keirau sokalou vakavuvale, keirau dau raitayaloyalotaka ni keirau tu e mataveilewai me keirau tutaka neirau vakabauta. E sega ni rawarawa me keirau vakamacalataka vakamatau ena veidokai na neirau vakabauta me vaka e cakava o Brother Anatoliy. Oti neirau sokalou vakavuvale, keirau sa qai volekati ira ga vakalevu na mataveitacini. Keirau raica tale ga kina vakabibi na vuna meda dau tu vakarau ni tutaka noda vakabauta, qai sakitaka nida iVakadinadina i Jiova.”

Na kedra irogo na tacida e uqeti Sister Anna Ravoajarison mai Madagascar, me vakavinakataka nona ivakarau ni masu. Kena ivakaraitaki, ni wilika oti o Anna na italanoa me baleti Brother Jovidon Bobojonov, e kaya: “Niu osooso vakalevu e veisiga, sa vaka me dua tu ga noqu ivakarau ni masu. Keu sega ni vakasamataka rawa ena loma ni vica na miniti na ka meu tukuna vei Jiova, ena tautauvata tu ga na ka au masulaka.” Ni vakasamataka o Anna na ivakaraitaki i Jovidon, e biuti koya sara ga ena kena ituvaki. E vakasamataka, ‘Au na rawa ni vakamatatataka na ka au masulaka keu sotava tale ga na ituvaki ya?’ E kaya o Anna: “Au vulica kina ni bibi meu dau vakasamataka rawa na ka meu tukuna vei Jiova ni bera niu masu. Vinaka vakalevu na irogo ena noda website.”

Rau painia tudei tiko e Potukali o Brother Ruben Catarino kei watina o Andreia. Na kedra irogo na tacida e vakavolekati rau vei ira na mataveitacini. E kaya o Ruben: “Keirau dau kila nira tusaqati tiko na tacida ena so na vanua, ia keirau sega ni kilai ira vinaka sara, na kedra ituvaki se na veika dredre era sotava. Qo ni sa biu mai na kedra irogo ena website, keirau sa qai kilai ira vinaka. Rawa sara ga nida masulaki ira kei na ituvaki era sotava. Eda na veivolekati kina kei ira na tacida, ena yaga tale ga kina vakalevu na noda masu.”

Levu vei keda ena duavata kei na rai nei Sister Cecilia Cardoso, e dua na painia tudei mai Potukali. E kaya: “Au vulica mai na ka era sotava na tacida ni dodonu meu raica vakabibi noqu vuli vakataki au. Niu vakatitobutaka noqu vulica na iVolatabu, qori e vukei au meu nuitaki Jiova vakalevu qai lomani koya mai vu ni lomaqu. Ena vukei au meu kua ni rerevaka e dua na ka. Au vulica nida na rere ga vakalevu ke da sega ni nuitaki Jiova.”

Eda vakavinavinakataka ni tabaki ena jw.org na nodra ivakaraitaki ni yaloqaqa, kei na nodra vakabauta na tacida. E uqeti keda na kedra irogo meda “yaloqaqa da qai kaya: ‘E dau vukei au o Jiova, au na sega ni rere.’”—Iperiu 13:6.