Ena Maji, 2019 ni oti na vakacaca ni cagilaba o Idai ena cevaicake kei Aferika, e tuvanaka na valenivolavola ni tabana e Malawi, Mozambique, kei Zimbabwe e 14 na Komiti ni Vakacoko mera vukei ira na tacida era vakaleqai. E rauta ni 1,434 nodra vale na tacida e vakacacani ena tolu na vanua qori. Ia sa tara tale se vakavinakataki e sivia e 650 nodra vale. E vakacacani tale ga e 29 na Vale ni Soqoni, ia sa tara tale e 8, e 10 tale ga sa vakavinakataki.

Ena ciwa na vula sa oti, e sivia na le 3,500 na tacida era veivuke vei ira na tacida ena veivanua qori. Eso era gole mai vakayawa ena veivanua e Aferika, Brazil, Varanise, Itali, kei Merika. O ira e tiko nodra kila vakacakacaka era sa vakavulici ira tiko na tacida e kea ena iwalewale maqosa ni cakacaka, me vaka na tuva biriki kei na matai.

E vakacacani vakadua e rauta ni 70 na pasede nodra itei na tacida ni oti nona ravuravu o Idai, e Manica kei Sofala, e Mozambique. Ena veidusimaki ni valenivolavola ni tabana, e vakarautaka kina na Komiti ni Tabana vei ira na tacida e dua na ibinibini levu na kakana, me vaka na falawa, bini, waiwai, masima kei na suka. E soli tale ga vei ira na sore ni tei ni tomata, sila kei na raisi.

E kaya na valenivolavola ni tabana e Malawi ni na vakacavari tiko na vakacoko ena vanua qori ena Feperueri, 2020. E Mozambique ena oti ena Janueri, 2020, e Zimbabwe ena oti tiko ena Seviteba, 2019. Na isau kece ni veivuke ena vanua qori e $4 na milioni (U.S.).

E kaya o Trent Edson, e lewe ni Komiti ni Tabana e Zimbabwe, e veivuke tale ga ena Tabana ni Vakacoko: “Dua na ka nodra marau na tacida ni tara tale nodra vale. E totoka nida raici ira na tacida na e ke, kei ira na tacida mai vanuatani nira veivukei qai veivakayaloqaqataki. E levu era via veivuke.”

Meda duavata kei ira na sivia na le 10,000 na tacida era vakacacani ena cevaicake kei Aferika, nida vakavinavinakataki Jiova ena ivakaraitaki totoka ni loloma vakaveitacini ena “gauna ni rarawa.”—Vosa Vakaibalebale 17:17.