TISEBA 8, 2022
IROGO MAI VEIYASA I VURAVURA

Vesu me Ono na Yabaki

SARAVA/ROGOCA

Ena ika30 ni Noveba 2022, e kaya na mataveilewai na Armyanskiy City Court of the Republic of Crimea, ni cala o Brother Aleksandr Dubovenko kei Brother Aleksandr Litvinyuk. Rau vesu me ono na yabaki. Ni tau oti ga na lewa rau sa kau me rau lai vesu.

Kedrau iTukutuku

Aleksandr Dubovenko

Sucu 1973 (Ochakiv, Ukraine)

Me baleti koya: E dau tuki kaukamea, daunilivaliva, e cakacaka tale ga vakamatai. Rau vakamau kei Irina ena 1999

E iVakadinadina i Jiova o tinana qai vakavulici koya ena ka dina. E marautaka ni vulica na yalayala ena iVolatabu me baleta na parataisi e vuravura. Papitaiso sara ena 1999

Ka e Tukuna a

O vosota vakacava nomu vesu tu e vale?

E sivia e 13 na vula noqu sega ni vakadonui meu vosa vua e dua, vakavo ga o ira na dauveivaqaqai kei na loya. E sega ni vakatarai tale ga meu vosa vei ira na mataveitacini era mai vakadinadina ena noqu kisi. Ia au vakasamataka vakatitobu nona ivakaraitaki o Ilaija. A tu ena vanua talasiga qai lomaleqa vakalevu. E vakayaloqaqataki koya o Jiova qai vakadeitaka vua ni na tokoni koya. O Jiova e sega vakadua ni biuti Ilaija, au nuidei tale ga ni na sega ni biuti au.

Aleksandr Litvinyuk

Sucu: 1960 (Amangeldi, Kazakhstan)

Me baleti koya: E dau tuki kaukamea ena dua na vanua ni buli kasi (buli kasi). Rau vakamau kei Nadezhda ena 1979, qai dua na luvedrau tagane

E vaqaqa na vuna e vakalaiva kina na Kalou na rarawa kei na ivakarau ca. Rau vulica kei Nadezhda na iVolatabu vei ira na iVakadinadina i Jiova, qai vakacegui koya na isau ni nona lomatarotaro. Papitaiso sara ena 1993

Ka e Tukuna b

O vakarautaki iko vakacava ena veivakacacani?

Niu rogoca nodra vakacacani na mataveitacini, au dau vaqaqa keu na rawa ni vosota tale ga. Au vakadeitaka kina niu se bera tu ni vakarau. Au mani wilika qai vakasamataka vakatitobu na itukutuku vakaivolatabu me baleti ira na vosota na veika dredre. Au saga meu kila na sala era vosota kina qai nuitaki Jiova. Niu dikeva na kedra italanoa, e vaka ga au vakila tiko na veika era sotava. Keirau dau wilika tale ga vakaveiwatini na kedra italanoa na tacida yalodina ena gauna qo. E vaqaqacotaka sara ga neirau vakabauta, e vakarautaki keirau tale ga ena veika keirau na vakarau sotava.

E vukei iko vakacava nodra veinanumi ena masu na mataveitacini?

Au dau tagi sara ga niu rogoca nira masulaki au tiko. Era kerei Jiova me solia vei au na lomavakacegu, vakaukauataki au, qai vakayaloqaqataki au. Ni bera ni dau caka na veilewai, ena tarogi au e dua na tacida tagane se cava au masulaka me baleta na veilewai. Qori tale ga na ka ena masulaka ni wawa tiko e tuba. E vakayaloqaqataki au dina qori.

Eda vakacegui nida kila o Jiova ena tokoni keda tu ga ena vanua se gauna cava ga eda sotava kina na veika dredre.—Same 139:7-12.

Veitaravi ni Gauna

Okosita 2, 2021

Rau tekivu vaqaqai. Beitaki ni rau cala ena nodrau vakayagataka na vidio me tokoni kina na cakacaka ni isoqosoqo e vakavuna na tikoyavavala
Okosita 5, 2021

Caka na vaqaqara ena nodratou vale e le walu na tacida, wili kina nodrau vale o Dubovenko kei Litvinyuk. E kau o Brother Litvinyuk qai vesu tu vakawawa
Okosita 6, 2021

Sere o Brother Litvinyuk qai vakatatabutaki i vale
Okosita 9, 2021

Vaqaqara na vakailesilesi ena ikarua ni gauna ena vale nei Dubovenko. E vakatarogi o Aleksandr qai vesu tu e nona vale
Okosita 11, 2021

Beitaki ni cala o Brother Litvinyuk ni tuvanaka tiko na cakacaka ni isoqosoqo e vakavuna na tikoyavavala
Feperueri 8, 2022

Beitaki ni cala o Brother Dubovenko ni tuvanaka tiko na cakacaka ni isoqosoqo e vakavuna na tikoyavavala
Epereli 29, 2022

Tekivu na veilewai. E sega ni vakadonuya na turaganilewa me qaravi vakavuniwai o Brother Litvinyuk e nona vale
Seviteba 8, 2022

E vakadonui e veisiga me rau biuta ga nodrau vale ena vitu na kaloko ena mataka kei na vitu na kaloko ena bogi.
Noveba 30, 2022

Rau vesu me ono na yabaki

a b Ni bera ni vesu, sa tauri rawa nona itukutuku.

Rawa ni o Wilika Tale ga

ITUKUTUKU VOU

Vesu ena Vuku ni Nodra Vakabauta—⁠Rusia

Era vesu ena vuku ni nodra vakabauta na iVakadinadina i Jiova mai Rusia. Vulica na kedra itukutuku, qai tabaka (print) tale ga na lisi ni yacadra kece na iVakadinadina i Jiova era vesu tiko ena gauna qo.

ITUKUTUKU VOU