Ena ika15 ni Epereli 2022, era vakananuma kina na iVakayakavi ni Turaga e vica vata na milioni na iVakadinadina i Jiova, kei ira na sureti. Sa oti qo e rua na yabaki ra qai vakananuma vata tale na soqo qori ena nodra vale ni soqoni. O ira na sega ni rawa ni gole ena iVakananumi era sema ga ena zoom.

Na iVakananumi ni mate i Jisu e dua na soqo bibi vei ira na iVakadinadina i Jiova, qai dau caka e veiyabaki. Rua na yabaki na kena caka tiko ena zoom ena vuku ni matedewa na COVID-19. Ena 2021, e sivia na le 21 na milioni era tiko ena iVakananumi.

Eso se qai matai ni gauna qo mera gole kina ena iVakananumi. Kena vakaraitaki, o Markensia Remy mai Haiti, sa oti qo e dua na yabaki nona papitaiso. E kaya: “Au sega ni tukuna rawa na levu ni noqu marau niu tiko ena iVakananumi ena Vale ni Soqoni. Au vakila niu lewena e dua na vuvale mamarau.”

Eda vakavinavinakataki Jiova nona vakalougatataka na iVakananumi ena yabaki qo. Eda vakavinavinakataka tale ga vakalevu na nodrau vakaraitaki levu ni loloma na Kalou o Jiova, kei na Luvena o Jisu Karisito.—Joni 3:16.