Ena imatai ni Noveba ina ika31 ni Janueri 2024, e sivia ni le 19,000 na tacida era vakaitavi ena cakacaka vakavunau lavotaki ena veivanua e Bolivia kei Colombia. E vunautaki kina na itukutuku vinaka ena vosa vakaSipeni kei na 18 tale na vosa, okati kina na vosa vagalu ni Bolivia kei Colombia.

E dua na tacida tagane e vosa vakaSipeni e tiko e Guadalupe, e Colombia. E kidacala ni sa dolava mai e dua na marama nona vale qai kaya vua: “Keitou waraki iko sara tiko ga!” E vakamacalataka sara na marama qori, ni vica na siga sa oti rau veivosakitaka tiko vakaveiwatini me rau marautaka eso na olodei ni lotu se sega. E kaya tale ga o watina ni raici ira na tacida nira vunau voleka tiko e kea. E nuidei nira na gole na tacida i nodrau vale, mera sauma tale ga na nodrau taro. Rau marau na tacida me rau vukei ratou na vuvale me ratou vulica na iVolatabu. Sa tuvanaki tale ga e dua me sikovi ratou tiko.

Rau vunau tiko e rua na tacida yalewa vua e dua na marama o Miguelina ena tautuba ni dua na sitoa ena tauni o Cuatro Cañadas, e Bolivia. Oti nona vakamacalataka o Miguelina ni sa takali e dua e dau lomana, rau wilika sara na tacida na Vakatakila 21:​3, 4. E kaya sara o Miguelina ni vinakata me kila e levu tale na ka me baleta na iVolatabu. Ia e yawa na vanua e tiko kina qai sega nona talevoni. Oti e vica na siga rau vunau na tacida qori vua e dua na goneyalewa ena taudaku ni tauni tiko ga ya. Rau kidacala ni sa curu mai tuba o Miguelina, rau qai liaca ni rau vosa tiko vei luvena yalewa. Dua na ka nodratou marau! E tuvanaki sara me ratou vulica kece vakavuvale na iVolatabu.

Eda nuidei ni o Jiova e mareqeta vakalevu na nodra sasaga na mataveitacini mera vakaitavi ena vunau lavotaki qo. Ena vakalougatataki keda tiko ga nida vunautaka na itukutuku vinaka “vei ira na kabuli kece e ruku i vuravura.”​—Kolosa 1:23.