Ena ika20 ni Julai ina ika20 ni Okosita 2023, e vakayacori e dua na sotasota levu ni qito soka ni marama ena vica na siti e Ositerelia kei Niusiladi. Era gole yani kina e sivia na rua na milioni. Ena gauna qori, era vakaitavi e rauta ni 1,200 na tacida ena vunau lavotaki ena ciwa na siti e Ositerelia kei Niusiladi. Era kerea mera vuli iVolatabu e rauta na le 18.

Rau gole yani ina qiqi ni vunau e Serena, Ositerelia e rua na goneyalewa mai Idia. Rau taleitaka ni volai tu kina ni sega ni saumi na vulici ni iVolatabu. Rau via kila se vanua cava ena caka kina qori. Rau tukuna na tacida ni rawa sara ga ni rau yadua na qasenivuli me vakavulici rau ena iVolatabu. E vakamacalataki tale ga vei rau ni rawa ni rau kerea qori ena QR code ena iVola Marau me Tawamudu! Rau mani vakalewena sara na fomu ena internet, qai tekivu me rau vulica na iVolatabu.

Rau vukea e dua na goneyalewa e dua na veiwatini mai Brisbane Ositerelia. Rau raica ni vaka e sega ni kila na vanua me gole kina. A tukuna ni vaqara tiko na otela a vakaicili tiko kina. Rau mani vukei koya sara na veiwatini. Ni ratou vaqaqara tiko mani tukuna sara vei rau na veiwatini ni gole sara tiko mai Papua Niukini. Dua na ka nona marautaka ni qai kila ni rau dau tu e liu mai Papua Niukini na veiwatini. E bula sara ga nodratou veitalanoa, e solia vei rau na veiwatini na nona naba ni talevoni, rau solia tale ga vua na nodrau. Rau mani tuvanaka na veiwatini me rau vakasarasarataki koya ena taoni, qai vakayagataka na gauna qori me wasea vua na ka dina mai na iVolatabu. E vakadonuya me vulica na iVolatabu o goneyalewa ni lesu ina nona vanua.

Ena siti o Okaladi mai Niusiladi, e vunau na tacida yalewa o Terina vei rau na yadra vosa vakaPunjabi ena vanua ni ikelekele ni motoka. Ni ratou se veivosaki tiko, e vosa yani vakaPunjabi e dua tale na yadra. E nanuma na tacida yalewa ni sega ni vinakata me ratou veivosaki ni rau se cakacaka tiko. Ia e qai kurabuitaka ni tukuna mai na turaga ya ni vakadewataka tiko na nona ivakamacala. E kaya: “Rau tarogi au se cava na iVolatabu, au kaya vei rau ni nona ivola na Kalou. E dina ya?” E kaya vua o Terina ni donu na ka e tukuna, qai vakaraitaka ena jw.org na sala me ratou vulica kina na iVolatabu ena nodratou vosa.

Ena siti o Brisbane mai Ositerelia, e gole o Nicholas e dua na turaga ni Colombia vei rau na tacida ena qiqi ni vunau. E via kila na veika me baleta na noda soqoni. E kaya ni ratou iVakadinadina i Jiova o tinana, nona tutu kei nona bubu. Ratou dau sureti koya me tiko ena soqoni. Rau mani tuvanaka sara na tacida me veitaratara kei na ivavakoso vosa vakaSipeni. Ena loma ga ni dua na aua, e qiriti Nicholas e dua na tacida tagane me sureti koya ena Soqo ni Veiwasewase vosa vakaSipeni, e kena usutu “Vakaraitaka na Vosota”!

Keimami vakavinavinakataki ira na mataveitacini e Ositerelia kei Niusiladi era ‘rarama me vaka na cina’ nira vunautaka na itukutuku vinaka ni Matanitu ni Kalou ena soqo levu qo.—Filipai 2:15.