Ena ika13 ina ika17 ni Julai 2021, dua na ka na bi ni uca qai vakavuna me waluvu e levu na uciwai e Belgium, Jamani, Luxembourg, kei Necaladi. Eso era mate kina, ia e se bera ni kilai tiko qo na levu ni vakacaca e yaco. Qo e imatai ni waluvu levu duadua me bau yaco ena vica na vanua qori.

• E sega ni dua e mavoa vakaca se mate

• Era tokitaki e rauta ni 304 na dautukutuku

• Vakacacani vakaca e rauta ni 100 na vale

• Vakacacani vakalailai e rauta ni 242 na vale

• Vakacacani e 11 na Vale ni Soqoni

• E tauyavutaki e 4 na Komiti ni Vakacoko. Dua e Belgium, 2 e Jamani kei Luxembourg, qai dua tale e Necaladi

• E raica na Komiti ni Vakacoko me samaki qai vakavinakataki na vale era vakacacani. Okati kina na kena kau tani na soso kei na sigani na iyaya ni vale. E caka tale ga eso na ripea lalai

• Era vakarautaka tale ga na Komiti ni Vakacoko kei ira na qase ni ivavakoso na valelaca mera toka vakawawa kina na tacida, kei na medra wai

• Era veivakacegui tale ga vakayalo na ivakatawa ni tabacakacaka vei ira na tacida era vakaleqai

• E sega ni vakaleqai na nodra soqoni na tacida nira sa sema ga ena internet. Era veivakayaloqaqataki tale ga na lewe ni Komiti ni Tabana vei ira na tacida era vakaleqai

• E muri na vakatatabu ni matedewa ena gauna ni vakacoko

Ratou tokitaka eso na qase ni ivavakoso e Necaladi e dua na tacida yalewa itabaqase. Oti era veitaratara sara na qase ni ivavakoso vei luvena tagane e sega ni tiko ena dina. Era tukuna vua ni sega ni dua na leqa e yacovi tinana. E qai tukuna na tagane qori vei tinana: “O lewena e dua dina na lotu vinaka, nira qaravi iko vinaka!”

Era vakavinavinakataki ira na tacida eso na daubokobuka e Belgium. Era raica nira dara tu na tacida na isulu kei na iyaya mera taqomaki kina, qai tuvanaki vinaka na nodra cakacaka. Era qoroya tale ga eso na daubokobuka e Jamani, na nodra muria vinaka na tacida na ivakaro e soli vei ira. E kaya e dua vei ratou na daubokobuka: “Mera va tu mada ga qo o ira kece na dauvakacoko.”

Era vakavinavinakataka vakalevu na tacida na veivuke ni isoqosoqo. Era vakavinavinakataka tale ga na iLawalawa Dauvakatulewa, ni dau uqeti ira na tamata i Jiova mera tu vakarau ena gauna ni leqa tubukoso. Ia era vakavinavinaka sara vakalevu vua na Kalou o Jiova, ni vukei ira na nona tamata mera vakila na ‘vakacegu qai sega ni rerevaka na ka ca.’—Vosa Vakaibalebale 1:33.